Արգենտինայի ֆուտբոլի ազգային հավաքականին 2026 թվականի աշխարհի առաջնությունից հեռացնելու պահանջով համացանցում մեկնարկած առցանց արշավին արդեն միացել է ավելի քան 3 միլիոն մարդ։
Արշավն իրականացվում է «Argentina Out» կայքի միջոցով, որի նախաձեռնողները պնդում են, որ աշխարհի առաջնության մրցավարները նպաստում են Արգենտինայի հավաքականի առաջխաղացմանը՝ նշելով, թե FIFA-ի ղեկավարությունը համակրում է թիմի ավագ Լիոնել Մեսսիին։ «Ինչո՞ւ պետք է մյուս թիմերն ընդհանրապես մասնակցեն, եթե հաղթողն արդեն որոշված է», – նշված է արշավի նկարագրությունում։
Նշենք, որ Արգենտինայի հավաքականը աշխարհի առաջնության կիսաեզրափակչում հուլիսի 15-ին կմրցի Անգլիայի ընտրանու հետ, որը քառորդ եզրափակչում հաղթել էր Նորվեգիային։Մինչ այդ Արգենտինան 1/8 եզրափակչում հաղթել էր Եգիպտոսին, իսկ քառորդ եզրափակչում՝ Շվեյցարիային։ Երկու հանդիպումներից հետո մրցակից թիմերի ներկայացուցիչները դժգոհություն էին հայտնել մրցավարության վերաբերյալ։ Եգիպտոսի ֆուտբոլային ասոցիացիայի նախագահ Հանի Աբու Ռիդան պահանջել էր հետաքննել հանդիպման ընթացքում կայացված մի շարք մրցավարական որոշումներ։Իր հերթին FIFA-ի մրցավարական կոմիտեի նախագահ Պիերլուիջի Կոլինան հայտարարել էր, որ Եգիպտոսի հավաքականի մեղադրանքները մրցավարության վերաբերյալ անհիմն են։
Հետևեք մեզ տելեգրամում
