ԱՄՆ հետախուզությունը հայտնել է, որ Թուրքիայի իշխանությունները փորձել են գաղտնի կերպով ազդել ամերիկացի քաղաքական գործիչների և երկրի տեղական ինքնակառավարման մարմինների ընտրությունների ընթացքի վրա։ Այս մասին նշվում է ԱՄՆ Ազգային հետախուզության խորհրդի զեկույցում, որը գաղտնազերծվել և Սպիտակ տան կողմից հրապարակվել է հուլիսի 16-ին։ Փոխանցում է «ՏԱՍՍ»-ը:
Դեռևս 2020 թվականի օգոստոսով թվագրված փաստաթղթում նշվում է, որ Թուրքիայի բարձրաստիճան պաշտոնյաները, ներառյալ նախագահ Ռեջեփ Թայիփ Էրդողանը, համոզված են, որ ԱՄՆ կառավարական որոշ շրջանակներում հակաթուրքական տրամադրություններ են արմատացած, ինչի պատճառով փորձում են գաղտնի ներազդել Թուրքիայի նկատմամբ ամերիկացի քաղաքական գործիչների և թեկնածուների դիրքորոշման վրա։ Որպես Անկարայի կողմից ձեռնարկված քայլեր՝ զեկույցում մատնանշվում են տեղական ընտրարշավների գաղտնի ֆինանսավորումը, առանց պաշտոնական գրանցման լոբբիստական գործունեությունը և պետական լրատվամիջոցների կողմից սոցիալական ցանցերում թիրախային նյութերի տարածումը։
ԱՄՆ Ազգային հետախուզության խորհուրդը գործում է ԱՄՆ Ազգային հետախուզության տնօրենի գրասենյակի կազմում, որը համակարգում է ամերիկյան բոլոր 18 հետախուզական գերատեսչությունների աշխատանքը։ Զեկույցի հրապարակման օրը՝ հուլիսի 16-ին, ԱՄՆ նախագահ Դոնալդ Թրամփը հայտարարել է, որ հետախուզության գաղտնազերծված տվյալները վկայում են երկրի ընտրական համակարգերի՝ կիբերհարձակումների նկատմամբ չափազանց խոցելի լինելու մասին։
Հետևեք մեզ տելեգրամում
