ԱՄՆ-ն իններորդ գիշերն անընդմեջ ավիահարվածներ է հասցրել Իրանին։ Իրանական լրատվամիջոցների փոխանցմամբ՝ պայթյուններ են գրանցվել երկրի մի շարք քաղաքներում, այդ թվում՝ Սիրիկում, Ջասկում, Թավրիզում և Չաբահարում։ Այս մասին հայտնում է «Al Jazeera»-ն։
ԱՄՆ-ի Կենտրոնական հրամանատարությունը հայտարարել է, որ հարվածների թիրախում եղել են Իրանի ռազմական հրամանատարական կենտրոնները, հակաօդային պաշտպանության և ափամերձ հսկողության օբյեկտները, հրթիռների և անօդաչու թռչող սարքերի արձակման հարթակները, ինչպես նաև կապի համակարգերը։
Վաշինգտոնի հայտարարության համաձայն՝ գործողությունների նպատակն է թուլացնել այն ռազմական հնարավորությունները, որոնք, ըստ ԱՄՆ-ի, օգտագործվում են Հորմուզի նեղուցով անցնող առևտրային նավերի դեմ հարձակումների համար։ «Al Jazeera»-ի թղթակցի փոխանցմամբ՝ հարվածների հիմնական թիրախը կրկին Իրանի հարավային շրջաններն էին, որոնք վերջին օրերին բազմիցս ենթարկվել են ռմբակոծությունների։ Նրա խոսքով՝ առաջին անգամ հարվածներ են հասցվել նաև երկրի հյուսիս-արևմուտքում գտնվող Թավրիզ քաղաքին։
Միաժամանակ Իրանի Իսլամական հեղափոխության պահապանների կորպուսը հայտարարել է, որ պատասխան հարվածներ է հասցրել Հորդանանում և Քուվեյթում գտնվող ամերիկյան ռազմական օբյեկտներին՝ կիրառելով հրթիռներ և անօդաչու թռչող սարքեր։
ԱՄՆ նախագահ Դոնալդ Թրամփը հայտարարել է, որ վերջին հարվածները հասցվել են ի հիշատակ վերջին օրերին զոհված ամերիկացի զինծառայողների։ «Մենք շատ ուժեղ հարվածեցինք նրանց, և դա արեցինք մեր զոհված հայրենասերների պատվին», – ասել է Թրամփը՝ կրկնելով, որ «Իրանը չի կարող միջուկային զենք ունենալ»։
ԱՄՆ պետքարտուղար Մարկո Ռուբիոն հայտարարել է, որ Վաշինգտոնը շարունակում է բաց մնալ դիվանագիտական լուծումների համար, սակայն դրանք պետք է լինեն «իրական»։ Նա նաև կոչ է արել մյուս երկրներին աջակցել Հորմուզի նեղուցում նավարկության անվտանգությանը։ Իրանի և ԱՄՆ-ի միջև լարվածությունը շարունակում է աճել նաև Հորմուզի նեղուցում։ Վաշինգտոնը հայտարարել է, որ իրականացնում է իրանական նավահանգիստների ծովային շրջափակում, մինչդեռ Թեհրանը պնդում է, որ թիրախավորում է միայն այն նավերը, որոնք խախտում են նեղուցով նավարկության իր սահմանած կանոնները։
Հետևեք մեզ տելեգրամում
