Կասպյան խողովակաշարային կոնսորցիումը (ԿՏԿ) հայտնել է, որ հուլիսի 20-ի գիշերը Սև ծովում նավթատար նավ է ենթարկվել անօդաչու թռչող սարքի հարձակման։ Այս մասին հայտնում է ռուսական «ՌԲԿ»-ն՝ հղում անելով ընկերության մամուլի ծառայությանը։
Ըստ ԿՏԿ-ի՝ անօդաչուն հարվածել է «NELSA» նավթատար նավին, որը գտնվել է ծովային տերմինալի տարածքում՝ բեռնման աշխատանքներ իրականացնելիս։ Հարվածի հետևանքով նավի աջ հետնամասում հրդեհ է բռնկվել։ ԿՏԿ-ի տվյալներով՝ հրդեհը մի քանի ժամ անց մարվել է նավի անձնակազմի և վթարային արձագանքման խմբերի ուժերով։
Նավի միջազգային անձնակազմը, որը բաղկացած է եղել 22 հոգուց, տարհանվել է ԿՏԿ-ի քարշակների միջոցով։ Նավի վրա մնացել են միայն կապիտանն ու ավագ օգնականը։ Ընկերությունը հայտնել է, որ նավթատար նավը պահպանել է լողունակությունը, իսկ նավթի արտահոսք կամ հրդեհ նավթի պահեստարաններում չի գրանցվել։
Օրեր առաջ՝ հուլիսի 19-ին, ԿՏԿ-ի ծովային տերմինալը նույնպես ենթարկվել էր հարձակման, ինչի հետևանքով նավթի բեռնման աշխատանքները ժամանակավորապես դադարեցվել էին։ Հարձակման պահին վնասվել էին երկու ծովային նավթատարներ։ ԿՏԿ-ի աշխատակիցների և կապալառու կազմակերպությունների շրջանում տուժածներ չեն եղել։
Հետևեք մեզ տելեգրամում
