Իսրայելական հեղինակավոր «Haaretz» պարբերականը հայտնում է, որ Հայոց ցեղասպանության ճանաչման մասին օրինագիծը Իսրայելի խորհրդարանի՝ Քնեսեթի օրակարգից հանվել է Ադրբեջանի ճնշման հետևանքով։
Հունիսի վերջին Իսրայելի կառավարությունը, արտաքին գործերի նախարար Գիդեոն Սաարի նախաձեռնությամբ, միաձայն հավանություն էր տվել Հայոց ցեղասպանության ճանաչման մասին օրինագծին։ Այն օրենքի ուժ ստանալու համար պետք է ընդունվեր նաև Քնեսեթի կողմից։
Սակայն, «Haaretz»-ի տեղկություններով՝ Ադրբեջանի նախագահ Իլհամ Ալիևի արտաքին քաղաքականության հարցերով խորհրդական Հիքմեթ Հաջիևը կապ է հաստատել Իսրայելի վարչապետ Բենիամին Նեթանյահուի հետ, ինչից հետո վարչապետի անձնական միջամտությամբ օրինագիծը հանվել է խորհրդարանի օրակարգից։
Օրինագիծը հետ է կանչվել Քնեսեթի ամառային արձակուրդից անմիջապես առաջ՝ խորհրդարանի աշխատանքների դադարեցումից և առաջիկա ընտրություններից առաջ, ինչի հետևանքով Հայոց ցեղասպանության ճանաչման հարցը հետաձգվել է անորոշ ժամանակով։
«Haaretz»-ը նշում է, որ Ադրբեջանի միջամտության մասին տեղեկությունները շրջանառվում էին նաև ավելի վաղ։ Ադրբեջանի պետական «APA» գործակալությունը ևս անդրադարձել էր հունական մամուլում հայտնված նման հրապարակումներին, սակայն չէր հաստատել Բաքվի անմիջական մասնակցությունը։
Պարբերականը հիշեցրել է, որ Ադրբեջանը, լինելով Իսրայելի ռազմավարական գործընկերներից մեկը և միաժամանակ Թուրքիայի սերտ դաշնակիցը, երկար տարիներ հանդես է գալիս Հայոց ցեղասպանության միջազգային ճանաչման դեմ։ Միևնույն ժամանակ Իսրայելը Ադրբեջանի խոշորագույն էներգետիկ գործընկերներից է, իսկ Բաքուն իսրայելական ռազմական տեխնոլոգիաների կարևոր գնորդներից։
Հետևեք մեզ տելեգրամում
