Մոսկվայի և Տամբովի մարզերում գտնվող Wildberries-ի խոշոր լոգիստիկ կենտրոնների ոչնչացման հետևանքով առաջացած վնասը կարող է դառնալ ամենախոշորներից մեկը՝ Ուկրաինայի հարվածների հետևանքով Ռուսաստանի տարածքում գրանցված դեպքերի շարքում, հայտնել է «The Moscow Times»-ը։
Նախնական գնահատականներով՝ շուրջ 350 հազար քառակուսի մետր ընդհանուր մակերեսով երկու պահեստների ամբողջական այրման հետևանքով ոչնչացվել են ոչ միայն լոգիստիկ համալիրները, որոնց արժեքը գնահատվում է մոտ 30 միլիարդ ռուբլի, այլև այնտեղ պահվող ապրանքները։ Data Insight գործակալության առաջատար վերլուծաբան Սերգեյ Սեմկոյի գնահատմամբ՝ ոչնչացված ապրանքների արժեքը կազմում է առնվազն 150 միլիարդ ռուբլի, իսկ որոշ հաշվարկներով կարող է հասնել 170–230 միլիարդ ռուբլու։
Այսպիսով՝ ընդհանուր վնասը, նույնիսկ ամենապահպանողական գնահատականներով, կազմում է առնվազն 180 միլիարդ ռուբլի, ինչը գերազանցում է Ռուսաստանի 53 տարածաշրջանների տարեկան բյուջեները։ Համեմատության համար՝ Օմսկի մարզի տարեկան բյուջեն կազմում է 178,6 միլիարդ ռուբլի, Բելգորոդի մարզինը՝ 177,3 միլիարդ, Ուդմուրտիայի Հանրապետությանը՝ 172,6 միլիարդ, իսկ Տուլայի մարզինը՝ 169,6 միլիարդ ռուբլի։
Վնասի չափը շուրջ երկու անգամ գերազանցում է Իվանովոյի մարզի տարեկան բյուջեն, գրեթե երեք անգամ՝ Օրյոլի մարզինը, իսկ Ռուսաստանի ամենափոքր բյուջե ունեցող տարածաշրջանների՝ Կալմիկիայի, Նենեցի ինքնավար օկրուգի և Հրեական ինքնավար մարզի բյուջեները՝ գրեթե վեց անգամ։
Wildberries-ի հիմնադիր Տատյանա Կիմը հայտարարել է, որ ընկերությունը քննարկում է իր ապրանքները կորցրած վաճառողներին փոխհատուցելու հնարավորությունը։ Սակայն, ըստ Forbes-ի, դրա համար կարող է պահանջվել գումար, որը գրեթե հավասար է ընկերության ամբողջ տարեկան շահույթին. 2025 թվականին այն կազմել է շուրջ 175 միլիարդ ռուբլի։
Միևնույն ժամանակ, հրդեհից ընդամենը երկու շաբաթ առաջ՝ հուլիսի 7-ին, ուժի մեջ էր մտել Wildberries-ի թարմացված օֆերտան, ըստ որի ընկերությունը ազատվում է պատասխանատվությունից այն դեպքերում, երբ ապրանքները կորում կամ վնասվում են անօդաչու թռչող սարքերի, հրթիռների կամ այլ զինամթերքի հարվածների հետևանքով։
Իրավաբան Կոնստանտին Ստեպանովի գնահատմամբ՝ նոր պայմաններին համաձայնած վաճառողների դատական ճանապարհով փոխհատուցում ստանալու հնարավորությունները նվազագույն են, քանի որ նման հարձակումները օֆերտայում ներառվել են որպես ֆորսմաժորային հանգամանք։
Իրավաբանական «Правовая Помощь» ընկերության ղեկավար գործընկեր Ալեքսանդր Տարասենկոն, իր հերթին, ուշադրություն է հրավիրել այն հանգամանքի վրա, որ հրդեհից հետո վաճառողների անձնական հաշիվներից անհետացել են այրված պահեստներում գտնվող ապրանքների մնացորդների վերաբերյալ հաշվետվությունները, որոնք կարող էին փոխհատուցման պահանջ ներկայացնելու հիմնական ապացույցը դառնալ։
Bloomberg Economics-ի գլխավոր տնտեսագետ Եկատերինա Վլասովայի գնահատմամբ՝ եթե Ուկրաինայի հարվածները Ռուսաստանի լոգիստիկ կենտրոններին շարունակական բնույթ կրեն, դա կարող է երկարաժամկետ բացասական ազդեցություն ունենալ երկրի տնտեսության վրա։ Ընկերությունները ստիպված կլինեն ավելի մեծ ծախսեր կատարել անվտանգության ապահովման, պահեստային հզորությունների դիվերսիֆիկացման և նոր լոգիստիկ ենթակառուցվածքների ստեղծման համար, ինչը, ի վերջո, կարող է հանգեցնել սպառողական գների աճի և գնաճի արագացման։
Հետևեք մեզ տելեգրամում
