Վրացի «MMA» մարտիկ Գեորգի Կարտվելիշվիլին հայտարարել է վրացական ավանդույթների, արժեքների և ազգային ինքնության պաշտպանությանն ուղղված հասարակական շարժում ստեղծելու մասին։ Այս մասին հայտնում է վրացական «NewsGeorgia»-ն։
Կարտվելիշվիլին նշել է, որ շարժումը պայքարելու է այն մարդկանց և խմբերի դեմ, որոնք, իր պնդմամբ, ֆինանսավորվում են արտերկրից, գործում են արտաքին շահերի ազդեցության ներքո և տարածում խեղաթյուրված գաղափարախոսություն։ Նա, սակայն, չի ներկայացրել, թե կոնկրետ որ մարդկանց կամ կազմակերպությունների մասին է խոսքը։
Մարտիկը նաև չի մանրամասնել, թե ինչ մեթոդներով է շարժումը պատրաստվում գործել՝ նշելով միայն, որ այն լինելու է ակտիվ և կառուցողական։ Միաժամանակ նա հայտարարել է, որ ազգային ինքնության և մշակույթի պաշտպանության համար չեն նահանջելու որևէ սպառնալիքի առաջ և պատրաաստ են անհրաժեշտության դեպքում նույնիսկ բանտ նստել։
Վրացական «Sova» պարբերականը նշում է, որ իշխող «Վրացական երազանք» կուսակցությունը ևս խոսում է ընտանիքի արժեքների և վրացական ավանդույթների պաշտպանության անհրաժեշտության մասին։ Երկրում այդ համատեքստում ընդունվել է ընտանեկան արժեքների և անչափահասների պաշտպանության մասին օրենքը, որը Վրաստանի հասարակության մի մասի կողմից ընկալվում է որպես ԼԳԲՏՔ համայնքի դեմ օրենք։
Իշխող կուսակցությունը ողջունել է նոր շարժման ստեղծումը՝ միաժամանակ ընդգծելով, որ արժեքների պաշտպանությունը պետք է իրականացվի օրենքի շրջանակում։ Ընդդիմությունը, սակայն, զգուշացրել է հնարավոր ինքնադատաստանի և բռնության վտանգի մասին։
Վրաստանի երիտասարդ իրավաբանների ասոցիացիան ևս հայտարարել է, որ շարժման ստեղծումը կարող է սպառնալիք ներկայացնել մարդկանց համար։ Կազմակերպությունը իրավապահներին կոչ է արել կանխել հնարավոր բռնությունները և պաշտպանել քաղաքացիներին՝ հիշեցնելով, որ Վրաստանի օրենսդրությամբ ապօրինի կամ բռնի խմբավորումների ստեղծումն արգելված է։
Հետևեք մեզ տելեգրամում
