Ուկրաինայի նախագահ Վոլոդիմիր Զելենսկին ԱՄՆ նախագահ Դոնալդ Թրամփին խնդրել է հրատապ կարգով Ուկրաինային տրամադրել Patriot հակաօդային պաշտպանության համակարգերի համար նախատեսված հրթիռներ։ Այդ մասին նա հայտարարել է Axios-ին տված հարցազրույցում։
Զելենսկու խոսքով՝ Ռուսաստանի նախագահ Վլադիմիր Պուտինը շարունակում է շարժվել էսկալացիայի ճանապարհով և կարող է փորձել հակամարտության մեջ ներքաշել նաև տարածաշրջանի այլ երկրներ՝ ավելի հեշտ հաղթանակ ապահովելու նպատակով։
Նա հայտնել է, որ հուլիսի 28-ին Թրամփի հետ հանդիպման ընթացքում վերջինս համաձայնել է արագացնել Patriot համակարգերի համար հրթիռների արտադրության լիցենզիաների տրամադրումը։
Միաժամանակ Զելենսկին նշել է, որ նույնիսկ լիցենզիաների տրամադրման դեպքում մեծ քանակությամբ հրթիռների արտադրությունը կարող է տևել մեկից հինգ տարի, ինչը, նրա խոսքով, անընդունելի է։ Ուկրաինան նպատակ ունի մինչև ձմեռ ստանալ շուրջ 300 հրթիռ։
Զելենսկու խոսքով՝ Թրամփը խոստացել է փորձել աջակցել, սակայն ընդգծել է, որ դա բարդ է, քանի որ Patriot-ի հրթիռների պահանջարկ կա նաև Իրանի հետ կապված ռազմական գործողությունների պատճառով։
Ուկրաինայի նախագահը նշել է, որ Ռուսաստանը յուրաքանչյուր զանգվածային հարձակման ընթացքում կիրառում է 30-40 բալիստիկ հրթիռ, իսկ նման հարձակումներ իրականացնում է ամսական երեքից հինգ անգամ։
Նա նաև հայտարարել է, որ Ուկրաինան պատրաստ է ԱՄՆ-ի հետ կիսվել ցանկացած ռազմական տեխնոլոգիայով կամ փորձով, որը կարող է անհրաժեշտ լինել Վաշինգտոնին՝ Patriot համակարգերի համար հրթիռներ ստանալու դիմաց։
Հետևեք մեզ տելեգրամում
