Իրանը Թուրքիայի, Սաուդյան Արաբիայի և Պակիստանի միջև ստորագրված Մեքքայի համատեղ պաշտպանության համաձայնագիրը դիտարկում է որպես տարածաշրջանի երկրների՝ անվտանգության վերաբերյալ մոտեցումների հնարավոր փոփոխության նշան։ Այս մասին, «Tasnim» լրատվական գորրծակալության փոխանցմամբ, հայտարարել է Իրանի ԱԳՆ խոսնակ Էսմայիլ Բաղաեին։
Երկուշաբթի կայացած ամենշաբաթյա մամուլի ասուլիսում Բաղաեին նշել է, որ Իրանը մշտապես կոչ է արել տարածաշրջանի երկրներին համագործակցել և սեփական անվտանգությունն ամրապնդել առանց արտաքին դերակատարներից կախվածության։
Նրա խոսքով՝ հատկապես Գազայում պատերազմի և իսրայելական գործողությունների մեկնարկից հետո տարածաշրջանի երկրներն ավելի հստակ են սկսել ընկալել, թե որտեղից է բխում տարածաշրջանային և միջազգային կայունությանն ու անվտանգությանը սպառնացող հիմնական վտանգը։
Իրանի ԱԳՆ խոսնակն այդ համատեքստում մատնանշել է Լիբանանում, Պաղեստինում և Սիրիայում Իսրայելի գործողությունները, ինչպես նաև տարածաշրջանի այլ երկրների հասցեին հնչեցված սպառնալիքները։
«Այս զարգացումներն ամրապնդել են այն ընկալումը, որ տարածաշրջանի երկրներն այլևս չեն կարող ապավինել անվտանգություն ապահովելու վերաբերյալ ԱՄՆ-ի պնդումներին»,- նշել է Բաղաեին։
Նա նաև պնդել է, որ Միացյալ Նահանգներն ինքն է նպաստել տարածաշրջանում անկայունության խորացմանը, և որ Իսրայելը չէր կարող իրականացնել իր գործողություններն առանց Վաշինգտոնի աջակցության։
Բաղաեին ընդգծել է, որ, Թեհրանի համոզմամբ, տարածաշրջանային անվտանգությունն անբաժանելի է, և ցանկացած նախաձեռնություն, որը, իր ձևակերպմամբ, «ճիշտ է նույնականացնում թշնամուն և սպառնալիքը», կարող է նպաստել տարածաշրջանի անվտանգության ամրապնդմանը։
Հետևեք մեզ տելեգրամում
