Ռուսաստանն ազատ է արձակել 2022 թվականից երկրում ազատազրկված ամերիկացի նախկին ծովային հետևակային Ռոբերտ Գիլմանին։ Այս մասին հայտնել է ԱՄՆ նախագահ Դոնալդ Թրամփը, փոխանցում է Reuters-ը:
Ըստ Թրամփի՝ Ռուսաստանի նախագահ Վլադիմիր Պուտինի հետ քննարկումներից հետո ռուսական կողմը համաձայնել է 32-ամյա Գիլմանին ազատ արձակել՝ «հումանիտար նկատառումներից ելնելով»։ Ամերիկացի պաշտոնյաները ընդգծել են, որ Գիլմանի ազատ արձակման դիմաց ԱՄՆ-ն որևէ զիջման չի գնացել և ռուս բանտարկյալների փոխանակում չի իրականացրել։
ԱՄՆ պետքարտուղար Մարկո Ռուբիոն, ողջունելով Ռուսաստանի այս քայլը, միևնույն ժամանակ կոչ է արել ազատ արձակել Ռուսաստանում պահվող մյուս ամերիկացիներին, այդ թվում՝ 2024 թվականին դատապարտված թոշակառու ուսուցիչ Սթիվեն Հաբարդին։
Նշենք, որ Գիլմանը 2019-2020 թվականներին ծառայել է ԱՄՆ ծովային հետևակային կորպուսում: 2022 թվականի հունվարին նա ձերբակալվել է Վորոնեժում և ոստիկանին հարվածելու մեղադրանքով դատապարտվել 4,5 տարվա ազատազրկման։
Գիլմանի ընտանիքը, սակայն, հերքել է մեղադրանքը՝ նշելով, որ միջադեպը պատահականություն է եղել՝ առողջական խնդիրների պատճառով։ Հունիսի վերջին Գիլմանի առողջական վիճակը կտրուկ վատթարացել է, ինչից հետո նրան բանտային հիվանդանոցից տեղափոխել են քաղաքացիական հիվանդանոցի հոգեբուժական բաժանմունք։
Հետևեք մեզ տելեգրամում
