ԱՄՆ ֆինանսների նախարարությունը պատժամիջոցներ է կիրառել Վրաստանում գրանցված «SHPS Shelbit» ընկերության և դրա հետ կապված «Shelbit Exchange» կրիպտոհարթակի դեմ։ Վաշինգտոնը նրանց մեղադրում է Իրանի, մասնավորապես՝ Իսլամական հեղափոխության պահապանների կորպուսի կողմից փողերի լվացման և պատժամիջոցներից խուսափելու սխեմային մասնակցելու մեջ։ Այս մասին հայտնում է Newsgeorgia-ն:
ԱՄՆ ֆինանսների նախարարության արտասահմանյան ակտիվների վերահսկողության գրասենյակի փոխանցմամբ՝ Վրաստանում գրանցված այդ կազմակերպությունը Իրանի անվտանգության ուժերի համար կրիպտոակտիվների տարանցման հիմնական հանգույց է ծառայել։
Ըստ գրասենյակի՝ ԻՀՊԿ-ի վերահսկողության տակ գտնվող կրիպտոհասցեներից Shelbit Exchange-ի հաշիվներին փոխանցվել է ավելի քան 1 միլիոն դոլար, իսկ հակառակ ուղղությամբ՝ Shelbit-ից դեպի ԻՀՊԿ-ի կառույցներ՝ ավելի քան 2 միլիոն դոլար։
ԱՄՆ ֆինանսների նախարարությունը SHPS Shelbit-ի սեփականատեր է նշում Իրանի քաղաքացի Սիավաշ Քեյվանփուրին, որն ունի նաև Դոմինիկայի ու Աֆղանստանի քաղաքացիություն և նախկինում բնակվել է ԱՄԷ-ում։ Քեյվանփուրը ընկերությունների ցանց է հիմնել մի քանի երկրներում։ Վրացական ընկերությունից զատ, նրան են պատկանում կամ նրա վերահսկողության տակ են գտնվում կառույցներ ԱՄԷ-ում և Լեհաստանում
Հետևեք մեզ տելեգրամում
