Թուրքիայի իշխող կուսակցությունը հայտարարել է, որ «Առանց ահաբեկչության Թուրքիա» գործընթացը համաներում կամ ՔԲԿ-ի հետ բանակցություն չի ենթադրում

Թուրքիայի իշխող «Արդարություն և զարգացում» կուսակցությունը (ԱԶԿ) պարզաբանումներ է ներկայացրել «Առանց ահաբեկչության Թուրքիա» (Terörsüz Türkiye) գործընթացի շրջանակում ընդունված նոր օրենքի վերաբերյալ՝ ընդգծելով, որ այն համաներում կամ «Քրդական բանվորական կուսակցության» (ՔԲԿ) հետ բանակցային գործընթաց չի ենթադրում։

Թուրքիայի խորհրդարանի ընդունած «Ազգային համերաշխության և հասարակական ինտեգրման ամրապնդման մասին» օրենքի՝ «Պաշտոնական տեղեկագրում» հրապարակումից հետո ԱԶԿ-ի քաղաքական և իրավական հարցերի վարչությունը տեղեկատվական փաստաթուղթ է պատրաստել և ուղարկել կուսակցական կառույցներին։

Փաստաթղթում նշվում է, որ «Առանց ահաբեկչության Թուրքիա» և «Առանց ահաբեկչության տարածաշրջան» գործընթացի նպատակն է ՔԲԿ/ՔԲՀ-ի (PKK/KCK) բոլոր բաղադրիչների ամբողջական զինաթափումն ու կազմակերպության փաստացի գործունեության դադարեցումը։

ԱԶԿ-ն ընդգծել է, որ օրենքը համաներում չի նախատեսում։ Ըստ կուսակցության՝ «զինվորականների, ոստիկանների և խաղաղ բնակիչների սպանությունների համար պատասխանատու անձինք չեն կարող օգտվել համաներման օրենքի դրույթներից»։

Առանձին անդրադարձ է կատարվել նաև ՔԲԿ-ի առաջնորդ Աբդուլլահ Օջալանի հնարավոր ազատ արձակման հարցին։ ԱԶԿ-ն հայտարարել է, որ օրենքում նախատեսված չեն ո՛չ ընդհանուր համաներում, ո՛չ էլ «ազատ արձակման հույսի իրավունք», հետևաբար Օջալանը չի կարող օգտվել այս կարգավորումից։

Կուսակցությունը նաև ընդգծել է, որ գործընթացը ՔԲԿ-ի հետ «բանակցություն կամ սակարկություն» չէ։ Ըստ ԱԶԿ-ի՝ պետությունն իր անվտանգության և իրավական հնարավորությունների կիրառմամբ նպատակ ունի հասնել ահաբեկչության վերացմանը։