Սև ծովում՝ Ռումինիայի ափերի մոտ, անօդաչու թռչող սարքի հարվածի հետևանքով վնասվել և հրդեհվել է թուրքական «Royad Mammadov» բեռնատար նավը, որը հացահատիկ էր տեղափոխում։ Նավի անձնակազմից երկու մարդ զոհվել է, երեքը վիրավորվել են, իսկ մյուսները փրկվել են։ Այս մասին գրել է «Reuters»-ը՝ վկայակոչելով Ռումինիայի իշխանություններին։
Միջադեպը տեղի է ունեցել հոկտեմբերի 5-ին։ Նավը գտնվել է ափից մոտ 20 ծովային մղոն հեռավորության վրա։ Հարվածից հետո նավի վրա հրդեհ է բռնկվել, ինչից հետո Ռումինիայի փրկարար ծառայությունները սկսել են անձնակազմի տարհանումը։ Նավի 13 անդամներից երեք վիրավորներին ուղղաթիռով տեղափոխել են ափ՝ բժշկական օգնություն ցուցաբերելու համար, իսկ մնացած նավաստիներին փրկարարական նավերն են տեղափոխել։ Ռումինիայի իշխանությունները հայտնել են, որ երկու մարդ զոհվել է, սակայն, միջադեպի պատճառների վերաբերյալ Ռումինիայի իշխանությունները մանրամասներ չեն հայտնել։
Նշենք, որ սա վերջին օրերին Սև ծովում քաղաքացիական նավի վրա հարձակման 2րդ դեպքն է՝ ավելի վաղ Ուկրաինայի Օդեսայի մարզի նավահանգիստներից մեկում հարվածի էր ենթարկվել Լիբերիայի դրոշով բեռնատար նավը, ինչի հետևանքով մեկ նավաստի զոհվել էր, ևս երեքը՝ վիրավորվել։
Հետևեք մեզ տելեգրամում
