Թուրքիայի առևտրի նախարար Օմեր Բոլաթը Դամասկոսի միջազգային 63-րդ ցուցահանդեսի շրջանակներում հանդիպել է թուրք և սիրիացի գործարարների հետ: Բոալթը նշել է, որ երկրների միջև առևտրի ծավալը 2025-ին հասել է 3.7 մլրդ դոլարի ու կողմերը մտադիր են այն հասցնել 10 մլրդ դոլարի։
Այցի ընթացքում Բոլաթը հանդիպել է նաև Սիրիայի տնտեսության և արդյունաբերության նախարար Նիդալ Էլ-Շաարի հետ: Հանդիպման ընթացքում քննարկվել են երկու երկրների միջև առևտրի ծավալի ավելացումը, փոխադարձ ներդրումների խրախուսումը, բանկային և ֆինանսական ոլորտներում համագործակցությունը և Սիրիայի վերակառուցումը: 40 թուրքական ընկերություններից մոտ 200 մարդ մասնակցել է առևտրի նախարարության և Թուրքիայի արտահանողների խորհրդի կողմից կազմակերպված Սիրիայի ընդհանուր առևտրային պատվիրակության ծրագրին:
Ծրագրի բացման արարողության ժամանակ նախարար Բոլաթը նշել է, որ թուրքական գործարար աշխարհի ներկայացուցիչները հանդիպել են Սիրիայի պետական կառույցների և մասնավոր հատվածի ներկայացուցիչների հետ՝ առևտրային և ներդրումային հնարավորությունները գնահատելու համար։
Բոլաթը նաև ընդգծել է, որ Թուրքիայի և Սիրիայի տնտեսական հարաբերությունների զարգացումը երկու երկրների ընդհանուր շահերից է բխում, և որ թուրքական ընկերությունները, իրենց փորձով և լոգիստիկ հնարավորություններով, կարող են զգալի դեր խաղալ Սիրիայի տնտեսական վերականգնման և վերակառուցման գործում։
Հետևեք մեզ տելեգրամում
