Եմենի հութիները վերահսկողության տակ են վերցրել երկրի՝ Կարմիր ծովի ամբողջ ափը՝ ընդլայնելով իրենց վերահսկողությունը Բաբ էլ-Մանդեբի ռազմավարական նեղուցի նկատմամբ։ Այս մասին հայտնել է «Al Jazeera»-ն։
Հութիները արագ առաջխաղացման ընթացքում գրավել են Կարմիր ծովի ափին գտնվող վերջին բնակավայրերը՝ առաջանալով Եմենի միջազգայնորեն ճանաչված կառավարության ուժերի դիրքերի ուղղությամբ։ Կառավարության աղբյուրների և ականատեսների փոխանցմամբ՝ հութիները նաև առաջացել են դեպի Բաբ էլ-Մանդեբի նեղուցի կղզիներ։
Այսպիսով՝ Իրանի աջակցությունը վայելող հութիներն ամրապնդել են իրենց վերահսկողությունը Բաբ էլ-Մանդեբի նկատմամբ, որը Կարմիր ծովը կապում է Ադենի ծոցի հետ և միջազգային առևտրի կարևորագույն ծովային ուղիներից է։
Կառավարական ուժերի նահանջից հետո հութիների զինյալներին տեղափոխող նավակները հասել են Մայյուն կղզի, որը հայտնի է նաև Պերիմ անունով և գտնվում է Բաբ էլ-Մանդեբի նեղուցի կենտրոնական հատվածում։ Կառավարության ներկայացուցիչները հաստատել են կղզի հութիների հասնելու մասին տեղեկությունը։
Սանայում գործող «Yemen Press Agency»-ն, վկայակոչելով ռազմական աղբյուրները, հայտնել է, որ հութիները գրավել են նաև նեղուցը վերահսկող ալ-Օմարի ռազմակայանը։
Հութիների ռազմական խոսնակ, բրիգադի գեներալ Յահյա Սարիի՝ X-ում հրապարակված հայտարարության համաձայն՝ գործողության ընթացքում Սաուդյան Արաբիայի աջակցությունը վայելող ուժերը դուրս են մղվել վեց շրջաններից, որոնց ընդհանուր տարածքը կազմում է շուրջ 5400 քառակուսի կիլոմետր։
Սարին նաև հայտարարել է, որ հութիները հարվածներ են հասցրել յոթ ռազմական բրիգադների, ինչի հետևանքով, նրա պնդմամբ, հարյուրավոր մարդիկ սպանվել, գերեվարվել կամ վիրավորվել են։ Այս տեղեկությունները անկախ աղբյուրներով չեն հաստատվել։
Բաբ էլ-Մանդեբի նեղուցը ռազմավարական նշանակություն ունի միջազգային նավագնացության համար։ Այն կարող է դիտարկվել որպես Հորմուզի նեղուցին այլընտրանքային ծովային ուղի, որի միջոցով մինչև ԱՄՆ-ի և Իրանի միջև այս տարվա սկզբին սկսված պատերազմը տեղափոխվում էր համաշխարհային էներգակիրների շուրջ մեկ հինգերորդը։
Հետևեք մեզ տելեգրամում
