Վրաստանի վարչապետ Իրակլի Կոբախիձեն հայտարարել է, որ երկրի իշխանությունների նպատակն է «արմատախիլ անել ռուսատյացությունը»՝ միաժամանակ Ռուսաստանի նկատմամբ շարունակելով «պրագմատիկ, բայց սկզբունքային» քաղաքականությունը։ Այս մասին նա ասել է «Rustavi 2»-ի եթերում։
Կոբախիձեի խոսքով՝ այլատյացությունը, այդ թվում՝ ռուսատյացությունը, վրաց հասարակությանը բնորոշ երևույթ չէ։ Նա պնդել է, որ ռուսատյացության տարածումը Վրաստանում արհեստականորեն խթանվում է արտաքին ուժերի կողմից՝ քաղաքական լարվածություն առաջացնելու և տնտեսական խնդիրներ ստեղծելու նպատակով։
Վարչապետը նաև նշել է, որ ռուսատյացության դեմ պայքարը պետք է ուղղված լինի ոչ միայն դրա դրսևորումների, այլև դրա տարածման փորձերի կանխմանը։ Նրա խոսքով՝ վրաց հասարակության հանդուրժողականությունը թույլ չի տա, որ նման քարոզչությունը լայն տարածում ստանա, սակայն անհրաժեշտ է զգոն լինել։
Կոբախիձեն նաև անդրադարձել է 2008 թվականի պատերազմից հետո Վրաստանում Ռուսաստանի նկատմամբ վերաբերմունքին՝ նշելով, որ նույնիսկ այդ ժամանակ ռուսաստանցի զբոսաշրջիկների և Ռուսաստանի հետ տնտեսական կապերի դեմ բողոքներ չեն եղել։
«Ռուսաստանի նկատմամբ մեր քաղաքականությունը կշարունակի մնալ պրագմատիկ, բայց սկզբունքային։ Սա մեր խոստումն է վրաց ժողովրդին»,- հայտարարել է վարչապետը։
Հետևեք մեզ տելեգրամում
