ԱՄՆ նախագահ Դոնալդ Թրամփը հայտարարել է, որ Եվրամիության դեմ կարող են սահմանվել «շատ ծանր մաքսատուրքեր» և առանձին ուղղություններով սահմանափակվել առևտուրը, եթե Բրյուսելի և Կանադայի մերձեցումն ուղղված լինի ԱՄՆ-ի դեմ։ Այս մասին հայտնում է Financial Times-ը։
Թրամփը Կանադային՝ ԵՄ-ի ասոցացված անդամի կարգավիճակ տրամադրելու հնարավորությունը անվանել է պոտենցիալ թշնամական քայլ։
«Եթե մտադրությունները լավն են, ապա դա նորմալ է։ Եթե վատն են, մենք շատ ծանր մաքսատուրքեր կսահմանենք Եվրոպայի դեմ», – լրագրողներին ասել է Թրամփը՝ չբացառելով առանձին ուղղություններով ԵՄ-ի հետ առևտրի դադարեցումը: Նա նաև ԵՄ-ում Կանադայի համար հատուկ կարգավիճակ ստեղծելու գաղափարն անվանել է ծիծաղելի։
Լարվածության նոր փուլը սկսվել է այն բանից հետո, երբ Եվրահանձնաժողովի նախագահ Ուրսուլա ֆոն դեր Լայենը առաջարկել է Կանադայի հետ հարաբերությունները դուրս բերել գործող CETA համաձայնագրի շրջանակներից և երկրին տրամադրել ԵՄ-ի առաջին ասոցացված անդամի կարգավիճակը։
Նման կարգավիճակ ներկայում ԵՄ-ում գոյություն չունի, ուստի դրա ստեղծման դեպքում դեռ պետք է սահմանվեն Կանադայի իրավունքներն ու պարտավորությունները։
«Այս գործընկերությունն ուղղված չէ որևէ մեկի դեմ, այլ մեր ընդհանուր ուժի համար է», – հայտարարել է ֆոն դեր Լայենը՝ հավելելով, որ ԵՄ-ն ցանկանում է Կանադայի հետ հարաբերությունները հասցնել հնարավոր առավելագույն մակարդակի։
Առաջարկվող համագործակցությունը կարող է ընդգրկել պաշտպանական արդյունաբերությունը, էներգետիկան, արտադրությունը, կարևոր նշանակության օգտակար հանածոները, արհեստական բանականությունը, քվանտային տեխնոլոգիաները, կիբերանվտանգությունն ու Արկտիկան։ Նախաձեռնության իրականացման համար անհրաժեշտ կլինի ԵՄ բոլոր 27 անդամ երկրների համաձայնությունը։
Հետևեք մեզ տելեգրամում
