Լիտվան Ռուսաստանի կողմից հնարավոր հարձակման դեպքում պատրաստ է դիմակայել, սակայն միաժամանակ մշակել է տարբեր սցենարների, այդ թվում՝ բնակչության տարհանման ծրագրեր։ Այս մասին BBC-ի «Newsnight» հաղորդմանը հայտնել է Լիտվայի վարչապետ Մինդաուգաս Սինկյավիչյուսը։
Նրա խոսքով՝ Լիտվայի բնակիչներն իրենց «անընդհատ վտանգված» են զգում Ռուսաստանի կողմից, այդ թվում՝ երկրի օդային տարածք անօդաչու թռչող սարքերի ներխուժումների պատճառով։ Վարչապետը նշել է, որ հարձակման դեպքում երկիրը կպայքարի և կներգրավվի դիմադրության մեջ։ Միաժամանակ, ըստ նրա, իշխանությունները պատրաստվում են տարբեր հնարավոր սցենարների։ Որպես օրինակ նա նշել է քաղաքներից տարեց քաղաքացիների անվտանգ և կազմակերպված տարհանումը՝ ճանապարհներին խցանումներից խուսափելու նպատակով։
Լիտվան ՆԱՏՕ-ի անդամ է և ցամաքային սահման ունի Ռուսաստանի Կալինինգրադի մարզի հետ։ Սինկյավիչյուսը նշել է, որ երկիրը բախվում է կոնկրետ սպառնալիքների, որոնք ամեն օր չեն դրսևորվում, սակայն, նրա խոսքով, դրանք իրականություն են Լիտվայի համար։
Նշենք, որ վերջին շաբաթներին Լիտվայի օդային տարածքում մի քանի միջադեպ է արձանագրվել։ Նախորդ շաբաթ ՆԱՏՕ-ի կործանիչները խոցել էին Լիտվայի օդային տարածք մուտք գործած անօդաչու թռչող սարք։ Դրա ծագումը պաշտոնապես չի հաստատվել, սակայն Լիտվայի պաշտպանության նախարարը հայտնել էր, որ այն եկել էր Բելառուսի ուղղությունից։ Երկուշաբթի ուշ երեկոյան օդային երթևեկությունը ժամանակավորապես խափանվել էր նաև Վիլնյուսի օդանավակայանում՝ օդում հայտնված և օդապարիկների նմանվող օբյեկտների պատճառով։ Օդանավակայանի օպերատորը միջադեպը բնութագրել էր որպես Բելառուսի կողմից իրականացված «հիբրիդային հարձակում»։
Միաժամանակ ՆԱՏՕ-ն Լիտվայում ավելի քան 5 հազար զինծառայող ունի։ Գերմանիան 2023 թվականին հայտարարել էր Լիտվայում մարտական պատրաստության մշտական բրիգադ տեղակայելու մասին։ Այն նախատեսվում է լիարժեք գործարկել մինչև 2027 թվականը և պետք է ներառի շուրջ 5 հազար զինծառայող ու քաղաքացիական աշխատակից։ Բրիգադի հիմնական մասը տեղակայվելու է Լեհաստանի և Լիտվայի սահմանին գտնվող Սուվալկիի միջանցքի մոտ՝ Բելառուսի և Ռուսաստանի Կալինինգրադի մարզի միջև։
Հետևեք մեզ տելեգրամում
