«Մեծ յոթնյակի» երկրները (G7) համաձայնել են արտակարգ պահուստներից 100 միլիոն բարել հում նավթ և դիզելային վառելիք ուղղել շուկա էներգակիրների գների աճը մեղմելու նպատակով։ «Region Monitor»-ի փոխանցմամբ՝ այս մասին հայտնել է «Al Jazeera»-ն։
Որոշումն ընդունվել է Ֆրանսիայի նախագահ Էմանուել Մակրոնի նախագահությամբ անցկացված G7-ի առաջնորդների տեսակոնֆերանսից հետո։ Մատակարարումները համակարգվելու են Միջազգային էներգետիկ գործակալության միջոցով, սկսվելու են անմիջապես և շարունակվելու են չորս ամիս։ Առաջին 20 օրում նախատեսվում է շուկա ուղղել դիզելային վառելիքի զգալի ծավալ։
Առայժմ հստակ չէ, թե յուրաքանչյուր երկիր որքան նավթ և դիզելային վառելիք կտրամադրի։ Առաջիկա օրերին քննարկվելու է նաև անհրաժեշտության դեպքում դիզելի լրացուցիչ պաշարներ օգտագործելու հնարավորությունը։
G7-ի երկրները պայմանավորվել են նաև համակարգել նավթավերամշակող գործարանների տեխնիկական սպասարկման ժամանակացույցերը՝ միաժամանակյա դադարներից խուսափելու համար, և հնարավորության դեպքում ժամանակավորապես մեծացնել արտադրական հզորությունների օգտագործումը։ Խումբը կոչ է արել անդամ երկրներին միմյանց նկատմամբ էներգակիրների արտահանման սահմանափակումներ չկիրառել։
G7-ի հայտարարությունից հետո Brent տեսակի նավթի գինը կարճ ժամանակով նվազել է՝ հասնելով մեկ բարելի դիմաց 100 դոլարից ցածր մակարդակի, սակայն երեկոյան կրկին հասել է շուրջ 102 դոլարի։
Որոշմանը նախորդել էր ԱՄՆ նախագահ Դոնալդ Թրամփի ճնշումը եվրոպական երկրների վրա՝ դիզելային վառելիքի արտակարգ պահուստներն օգտագործելու պահանջով։ Թրամփը սպառնացել էր հակառակ դեպքում արգելել ԱՄՆ-ից դիզելի արտահանումը, սակայն ուրբաթ հայտարարել է, որ Վաշինգտոնը նման արգելք չի կիրառի։
Էներգակիրների թանկացումը պայմանավորված է մատակարարումների միաժամանակյա խափանումներով։ Իրանի դեմ ԱՄՆ-ի և Իսրայելի պատերազմը սահմանափակել է Պարսից ծոցի երկրներից արտահանումը, իսկ ռուսական նավթավերամշակող գործարաններին ուկրաինական հարվածները՝ Ռուսաստանից մատակարարումները։ Դիզելային վառելիքի համաշխարհային առաջարկի վրա ազդել է նաև Չինաստանի արտահանման դադարեցումը։
Մակրոնի գնահատմամբ՝ պահուստների օգտագործումը կնվազեցնի նավթամթերքների, հատկապես դիզելի գները։ Փորձագետները, սակայն, ակնկալում են սահմանափակ և ժամանակավոր ազդեցություն։
Դիզելի թանկացումն ազդում է նաև այլ ապրանքների գների վրա, քանի որ այն լայնորեն օգտագործվում է բեռնափոխադրումներում, գյուղատնտեսությունում և շինարարությունում՝ մեծացնելով արտադրության ու փոխադրման ծախսերը։
Հետևեք մեզ տելեգրամում
