Թուրքիայի, Սաուդյան Արաբիայի և Պակիստանի միջև կնքված «Մեքքայի պաշտպանական համաձայնագրի» ռազմաքաղաքական և պաշտպանական կոմիտեի նիստը կկայանա հոկտեմբերի 5-ին Էր Ռիադում։ «Region Monitor»-ի փոխանցմամբ՝ այս մասին հայտնել է Թուրքիայի արտաքին գործերի նախարարությունը։
Թուրքական պատվիրակության կազմում կլինեն արտգործնախարար Հաքան Ֆիդանը, պաշտպանության նախարար Յաշար Գյուլերը և զինված ուժերի գլխավոր շտաբի պետ, գեներալ Սելչուք Բայրաքթարօղլուն։ Նիստին կմասնակցեն նաև Պակիստանի և Սաուդյան Արաբիայի մի շարք պաշտոնյաներ։
«Հանդիպման ընթացքում կքննարկվեն տարածաշրջանի վերջին զարգացումները և դաշինքի ինստիտուցիոնալացման ուղղությամբ աշխատանքների ընթացքը»,- նշված է Թուրքիայի ԱԳՆ հայտարարությունում։
Հանդիպումը տեղի է ունենալու Եմենում ռազմական գործողությունների սրման ֆոնին։ Կիրակի օրը Սաուդյան Արաբիայի աջակցությունը վայելող Եմենի կառավարության ղեկավարը հայտարարել էր հութիների դեմ լայնածավալ ռազմական գործողության մեկնարկի մասին՝ նրանց վերահսկողության տակ գտնվող տարածքները գրավելու նպատակով։
Ավելի վաղ՝ հոկտեմբերի 2-ին, Պակիստանի արտգործնախարարը հայտնել էր, որ Իրանը հութիների հարձակումներից հետո առաջարկել է նրանց հետ քաղաքական երկխոսություն սկսել։ Նրա խոսքով՝ այդ առաջարկը ևս քննարկվելու է Էր Ռիադում կայանալիք նիստում։
Հետևեք մեզ տելեգրամում
