Ռուսաստանի Անվտանգության խորհրդի փոխնախագահ Դմիտրի Մեդվեդևը հայտարարել է, որ որոշ երկրներ փորձում են պառակտել Հարավային Կովկասի երկրները։ Նրա խոսքով՝ այդ նպատակով արտաքին ուժերը փորձում են ազդել տարածաշրջանի երկրների հարաբերությունների վրա, այդ թվում՝ Ռուսաստանի և Հայաստանի հարաբերությունների։ Այս մասին Մեդվեդևը հայտարարել է Իրանի Իսլամական Հանրապետության ռադիոյի և հեռուստատեսությանը տված հարցազրույցում։
Մեդվեդևը որպես օրինակ նշել է Վրաստանի՝ ՆԱՏՕ-ին անդամակցելու գործընթացը։ Նրա պնդմամբ՝ «Արևմտյան աշխարհը» Վրաստանին առաջարկել է անդամակցել ՆԱՏՕ-ին, սակայն դա, իր գնահատմամբ, «լավ արդյունքի չի հանգեցրել»։ Մեդվեդևը նաև ասել է, որ այժմ «փորձության են ենթարկվում» Ռուսաստանի և Հայաստանի հարաբերությունները։
Նշենք, որ Վրաստանը ՆԱՏՕ-ի անդամ չէ, սակայն երկար տարիներ համագործակցում է դաշինքի հետ և հայտարարել է անդամակցելու նպատակների մասին։ ՆԱՏՕ-ն 2008 թվականին որոշել էր, որ Վրաստանը կդառնա դաշինքի անդամ՝ անհրաժեշտ պայմանները կատարելու դեպքում։ Այդ որոշումը հետագայում վերահաստատվել է դաշինքի գագաթնաժողովներում։
Հարավային Կովկասում ՆԱՏՕ-ի գործընկերներն են Հայաստանը, Ադրբեջանն ու Վրաստանը։ Դաշինքը համագործակցում է տարածաշրջանի երեք երկրների հետ, սակայն նրանցից ոչ մեկը ՆԱՏՕ-ի անդամ չէ։
Հետևեք մեզ տելեգրամում
