Ռուսաստանի Իրկուտսկի մարզում հակաժանտախտային ինստիտուտի 28-ամյա աշխատակցուհու մահից հետո ժանտախտի հնարավոր տարածման մասին լուրեր են շրջանառվում։ «Euronews»-ի փոխանցմամբ՝ մահացած կնոջ հետ շփված մոտ 200 մարդ վերցվել է բժշկական հսկողության տակ, իսկ մի քանի հիվանդանոցներում սահմանափակումներ են մտցվել։ Միևնույն ժամանակ, Սպառողների իրավունքների պաշտպանության և մարդու բարեկեցության վերահսկողության դաշնային ծառայությունը («Ռոսպոտրեբնադզոր») հայտնել է, որ կնոջ մոտ ախտորոշվել է չպարզված ծագման թոքաբորբ, իսկ տարածաշրջանի համաճարակաբանական իրավիճակը կայուն է։
Մահացածը Իրկուտսկի հակաժանտախտային գիտահետազոտական ինստիտուտի լաբորանտ Դարյա Շիպիլովան է։ Նա մահացել է հոկտեմբերի 2-ի գիշերը՝ Շելեխով քաղաքի հիվանդանոցում։ Տեղական լրատվամիջոցների փոխանցմամբ՝ սեպտեմբերի 25-ին լաբորատոր աշխատանքի ընթացքում նա կոտրել է փորձանոթ, որում, ըստ հրապարակումների, եղել է ժանտախտի հարուցիչը՝ Yersinia pestis բակտերիան, ինչից հետո նրա առողջական վիճակը կտրուկ վատացել է։ Այս վարկածը պաշտոնապես չի հաստատվել։
Հոկտեմբերի 4-ին «Ռոսպոտրեբնադզոր»-ը հայտնել է, որ Շիպիլովայի կենսաբանական նմուշների ընդլայնված հետազոտությունը ցույց է տվել, որ դրանցում չկան նրա մասնագիտական գործունեության հետ կապված միկրոօրգանիզմներ։ Գերատեսչության տվյալներով՝ ինստիտուտում ախտածին միկրոօրգանիզմների հետ աշխատանքի ընթացքում որևէ արտակարգ պատահար կամ վթար չի արձանագրվել, իսկ վերջին 10 օրում աշխատակիցների շրջանում վարակիչ հիվանդությունների դեպքեր չեն գրանցվել։
Խուճապի պատճառներից մեկը պաշտոնական տեղեկատվության սկզբնական հակասականությունն էր։ Հոկտեմբերի 2-ին Իրկուտսկի մարզի նահանգապետ Իգոր Կոբզևը հայտնել էր «հատկապես վտանգավոր վարակի» կասկածի մասին՝ առանց հիվանդության անունը նշելու։ Ավելի ուշ Բուրյաթիայի ղեկավար Ալեքսեյ Ցիդենովը հայտարարել էր, որ կնոջ մահը կապված է ժանտախտի հետ։ Այնուամենայնիվ, հոկտեմբերի 4-ին «Ռոսպոտրեբնադզոր»-ը ներկայացրել է պաշտոնական ախտորոշումը՝ «չպարզված ծագման թոքաբորբ», և ընդգծել, որ տարածաշրջանում համաճարակաբանական իրավիճակը լիովին վերահսկելի է։
Հետևեք մեզ տելեգրամում
