Սաուդյան Արաբիայի աջակցությունը վայելող և միջազգային ճանաչում ունեցող Եմենի կառավարությունը հայտարարել է հութիների վերահսկողության տակ գտնվող տարածքները հետ վերցնելու լայնածավալ ռազմական գործողության մեկնարկի մասին։ Նախագահ Ռաշադ ալ-Ալիմին հայտարարել է, որ գործողությունները կշարունակվեն այնքան ժամանակ, մինչև երկիրը «ազատագրվի ահաբեկչական խմբավորման վերահսկողությունից»։ Այս մասին հայտնել է «Reuters»-ը։
Հութիները, որոնք պաշտոնապես կոչվում են «Անսար Ալլահ», 2014 թվականից վերահսկում են Եմենի մայրաքաղաք Սանան և երկրի հյուսիս-արևմուտքի մեծ մասը։ Ըստ աղբյուրի՝ անցած ամիս նրանք վերահսկողության տակ են վերցրել Բաբ էլ-Մանդեբի նեղուցը և Կարմիր ծովի ափի շուրջ 150 կիլոմետրանոց հատված։
Եմենի կառավարության հայտարարությունից հետո հութիները հայտնել են, որ բալիստիկ հրթիռներով և անօդաչու թռչող սարքերով հարվածներ են հասցրել Սաուդյան Արաբիայի «Saudi Aramco»-ի օբյեկտներին Ռիադում և Խուրայսի շրջանում։ Նրանք պնդել են, որ հարվածել են ի պատասխան վերջին 12 ժամվա ընթացքում Եմենում իրականացված 50 սաուդյան օդային և հրթիռային հարվածների։ Սաուդյան Արաբիան այդ տեղեկությունը չի հաստատել։
Վերջին 48 ժամում հութիները նաև առաջխաղացում են գրանցել Թաիզ քաղաքի մերձակա ռազմավարական բարձունքներում՝ առաջ շարժվելով դեպի Թաիզն Ադենի հետ կապող վերջին ճանապարհը։ Ըստ աղբյուրի՝ այդ ճանապարհի նկատմամբ վերահսկողությունը կարող է հանգեցնել Թաիզի շրջափակմանը։ Եմենի կառավարությունը հայտարարել է, որ ռազմական գործողության որոշումն ընդունվել է այն բանից հետո, երբ հակամարտության լարվածությունը թուլացնելու հնարավորությունները սպառվել են։
Հետևեք մեզ տելեգրամում
