2026 թվականի սկզբից մինչև հոկտեմբերի 4-ը Ադրբեջանի անվտանգային կառույցներում ոչ մարտական պայմաններում առնվազն 44 զինծառայող է մահացել։ Region Monitor-ի հաղորդմամբ՝ այս մասին հայտնում է ադրբեջանական «Խազար» ռազմական հետազոտությունների ինստիտուտը։
Ինստիտուտի մշտադիտարկման համաձայն՝ զինծառայողներից 13-ը մահացել են հիվանդության պատճառով, 9-ը՝ ավտովթարների, 7-ը՝ դժբախտ պատահարների, իսկ 5-ը՝ ինքնասպանության հետևանքով։ Մեկ զինծառայող մահացել է «անզգուշության հետևանքով»։ Եվս 9 զինծառայողի մահվան պատճառը չի նշվում։
Մահվան դեպքերն ամենաշատը եղել են հուլիսին․ այդ ամիս մահացել է 11 զինծառայող։
Մահացածներից 30-ը ծառայել են Ադրբեջանի պաշտպանության նախարարությունում, 10-ը՝ պետական սահմանապահ ծառայությունում։ Եվս 4 զինծառայող ծառայել է ներքին զորքերում, նախագահի անվտանգության ծառայությունում, արտակարգ իրավիճակների նախարարությունում և զորակոչի ու զինվորական ծառայության պետական ծառայությունում։
Ինստիտուտի տվյալներով՝ նույն ժամանակահատվածում առնվազն 8 զինծառայող վիրավորվել կամ վնասվածք է ստացել։ Նրանցից 5-ը տուժել է ավտովթարների, 2-ը՝ ականի պայթյունի հետևանքով, իսկ մեկ զինծառայող վնասվածք է ստացել լեռներում սահելու հետևանքով։
Մահացածների թվում եղել է 11 շարքային զինծառայող, 8 ենթասպա, 6 պայմանագրային զինծառայող, 5 սպա, 4 կուրսանտ և մեկ սերժանտ։ Եվս 9 զինծառայողի զինվորական կոչումը չի հաջողվել պարզել։
Ինստիտուտի տվյալներով՝ 2025 թվականին Ադրբեջանի անվտանգության և պաշտպանության ոլորտում ոչ մարտական պայմաններում մահացել էր առնվազն 43 զինծառայող, իսկ 2024-ին՝ 51։
Նշենք, որ Ադրբեջանի պաշտպանության նախարարությունը և մյուս պետական կառույցները զինծառայողների շրջանում մահվան դեպքերի վերաբերյալ ամփոփ պաշտոնական վիճակագրություն չեն հրապարակում։
Հետևեք մեզ տելեգրամում
