Ադրբեջանի իշխանությունների կողմից Արցախի տարբեր շրջաններ տեղափոխված ադրբեջանցիները շարունակում են դժգոհել տեղում կենցաղային պայմանների, աշխատատեղերի և սոցիալական անհրաժեշտ ծառայությունների բացակայությունից, ինչի արդյունքում շատերը վերադառնում են Բաքու: Region Monitor-ի հաղորդմամբ՝ այս մասին հայտնում են ադրբեջանական ընդդիմադիր ԶԼՄ-ները:
Ադրբեջանցիների հիմնական դժգոհություններից մեկը աշխատանքի բացակայությունն է։ Նրանց խոսքով՝ գյուղերում չկա դեղատուն և հասարակական տրանսպորտ, ինչի հետևանքով բնակիչները լրացուցիչ գումար են ծախսում այլ բնակավայրեր հասնելու համար, այդ թվում՝ բժշկական անհրաժեշտության դեպքում։
«Եթե գյուղում տուն կա, բայց աշխատանք չկա, հողից օգտվելու հնարավորություն սահմանափակ է, բիզնես կառուցելը դժվար է, իսկ մարդը եկամուտ ստանալու համար ստիպված է կրկին մեկնել այլ քաղաք, դժվար է դա «Մեծ վերադարձ» անվանել»,- դժգոհել է ադրբեջանցի Ռազիմ Էմիրասլանլին:
Այթաջ Էմիրջանլին էլ հայտնել է, որ շուրջ 10 ամիս է՝ գրանցված է զբաղվածության ծառայությունում, սակայն աշխատանքի կամ ապրուստի կայուն միջոցի հնարավորություն չի ստացել։ Էմիրջանլին սոցիալական ցանցերում տեսանյութ է հրապարակել՝ հայտնելով, որ պաշտոնյաներին անմիջականորեն դիմելուց հետո նա ճնշումների է ենթարկվել։ Էմիրջանլին ընդգծել է, որ «զղջում է Ղարաբաղ տեղափոխվելու համար և ստիպված է եղել իր դժգոհությունների մասին բարձրաձայնել սոցիալական ցանցերում»։
«Բոլորը գործազուրկ են։ Նրանց մեծ մասն արդեն փակում է տան դուռն ու գնում Բաքու։ Եթե նոյեմբեր-դեկտեմբեր ամիսներին գնաք Ղարաբաղ, այնտեղ շատ տների դռներ փակ կտեսնեք։ Բոլորը մեղադրում են, թե փախստականը տեղափոխվել է, բայց չի ուզում ապրել այնտեղ։ Իսկ եթե ես այնտեղ հացի փող չունեմ, ի՞նչ պետք է անեմ»,- նշել է նա։
Հիշեցնենք, որ ավելի վաղ տեսանյութ էր տարածվել Լաչինից, որտեղ հաստատված ադրբեջանցիները դժգոհել էին տեղում ստեղծված սոցիալ-տնտեսական վիճակից, աշխատատեղերի բացակայությունից: Տարեց մի ադրբեջանցի հայտարարել էր, որ շատերը պարզապես լքում են Լաչինը և վերադառնում իրենց հին տներ:
Հետևեք մեզ տելեգրամում
