Վրաստանի Բորժոմի-Բակուրիանի նեղուղի երկաթուղու հայտնի «Կուկուշկա» գնացքը վեց տարվա դադարից հետո դեկտեմբերին կվերսկսի երթևեկությունը։ Այս մասին հայտարարել է Վրաստանի էկոնոմիկայի և կայուն զարգացման նախարար Մարիամ Քվրիվիշվիլին։
Գնացքի վագոնների համար ընտրվել է նոր դիզայն, որը ըստ Քվրիվիշվիլիի համահունչ է Բակուրիանիի բնական միջավայրին և երկաթուղու պատմական բնույթին։
Բորժոմին և Բակուրիանին կապող 38 կմ երկարությամբ երկաթուղու վերականգնման աշխատանքներն ավարտական փուլում են։ Գնացքի երթևեկությունը դադարեցվել էր 2020 թվականին՝ կորոնավիրուսի համավարակի սկզբին, իսկ հետագայում դրա շահագործումը կասեցվել էր ենթակառուցվածքների մաշվածության պատճառով։
Նշենք, որ «Կուկուշկան» Վրաստանի հայտնի զբոսաշրջային գնացքներից է։ Երկաթուղին կանոնավոր շահագործվում է 1902 թվականից, իսկ 2017 թվականից երկաթուղային համալիրը՝ կայարաններով և կամրջով, ունի ազգային մշակութային ժառանգության հուշարձանի կարգավիճակ։
Երկաթուղու վերականգնման աշխատանքների արժեքը նախարարությունը չի հայտնել։ Գծի ամբողջական վերականգնման արժեքը նախկինում գնահատվել էր ավելի քան 90 միլիոն լարի։
Հետևեք մեզ տելեգրամում
