Կապանում Իրանի նորանշանակ գլխավոր հյուպատոս Դավուդ Յայջին իր հավատարմագրերի պատճենն է հանձնել ՀՀ արտաքին գործերի և միջազգային առևտրի նախարարության գլխավոր քարտուղար Դավիթ Կարապետյանին։ Region Monitor-ի փոխանցմամբ՝ այս մասին հայտնում է իրանական ISNA լրատվական գործակալությունը։
Ըստ հաղորդման՝ ՀՀ ԱԳՄԱՆ գլխավոր քարտուղարի հետ հանդիպման ընթացքում Իրանի գլխավոր հյուպատոսն ընդգծել է Սյունիքի մարզի ռազմավարական կարևորությունը Իրանի Իսլամական Հանրապետության համար։ Դավուդ Յայջին շեշտել է երկու երկրների համատեղ ջանքերի անհրաժեշտությունը՝ հայ-իրանական սահմանով տրանսպորտային ու քաղաքացիների երթևեկությունը դյուրացնելու և արագացնելու ուղղությամբ։
Դավիթ Կարապետյանն իր հերթին անդրադարձել է երկկողմ հարաբերություններում տնտեսական համագործակցության առաջնահերթությանը՝ կարևորելով Հայաստանի և Իրանի համատեղ քայլերը տնտեսական ոլորտում առկա գործընթացները բարելավելու ուղղությամբ։ Հանդիպման ավարտին Կարապետյանը հաջողություն է մաղթել Դավուդ Յայջիին Կապանում Իրանի գլխավոր հյուպատոսի պաշտոնում առաքելությունն իրականացնելու գործում։
Հետևեք մեզ տելեգրամում
