2026 թվականի հունվար-սեպտեմբերին Հայաստանը Վրաստանի խոշոր առևտրային գործընկերների շարքում զբաղեցրել է 7-րդ տեղը։ Երկու երկրների միջև ընդհանուր առևտրաշրջանառությունը կազմել է շուրջ 750 մլն դոլար։ Region Monitor-ի հաղորդմամբ՝ այս մասին հայտնում է Վրաստանի ազգային վիճակագրական ծառայությունը։
Վրաստանի հետ ամենամեծ առևտրաշրջանառությունն ունեցել են Թուրքիան՝ 2,5 մլրդ դոլար, Չինաստանը՝ 2,3 մլրդ դոլար և Ռուսաստանը՝ 2,2 մլրդ դոլար։ Ադրբեջանը 5-րդ տեղում է՝ 1,1 մլրդ դոլար ընդհանուր առևտրաշրջանառությամբ։
Երկրների միջև առևտրի կառուցվածքը դիտարկելիս՝ նույն ժամանակահատվածում Վրաստանից ամենաշատ ապրանք է արտահանվել Ղրղզստան՝ 650,2 մլն դոլարի, Չինաստան՝ 583,1 մլն դոլարի և Ադրբեջան՝ 566,7 մլն դոլարի։ Հայաստան է արտահանվել 503 մլն դոլարի ապրանք, ինչով երկիրը զբաղեցրել է 5-րդ տեղը։ Նախորդ տարվա նույն ժամանակահատվածի համեմատ Վրաստանից Հայաստան արտահանումն աճել է 29%-ով։
Վրաստանից Չինաստան արտահանման արժեքը նախորդ տարվա 217 մլն դոլարից հասել է 583,1 մլն դոլարի, իսկ Ադրբեջան արտահանումն աճել է 6,9%-ով։ Ղրղզստան արտահանումը նվազել է գրեթե 40%-ով՝ 2025 թվականի մոտ 1 մլրդ դոլարի համեմատ։
Վրաստանի ներմուծման խոշորագույն գործընկերներն են Թուրքիան՝ 2,18 մլրդ դոլար, Չինաստանը՝ 1,74 մլրդ դոլար և ԱՄՆ-ը՝ 1,71 մլրդ դոլար։ Հայաստանը Վրաստանի ներմուծումների առաջին տասնյակում չի ընդգրկվել, սակայն Վրաստանը Հայաստանից ներմուծել է 247 մլն դոլարի ապրանք։ Ադրբեջանը ներմուծման գործընկերների շարքում 6-րդն է՝ 542,5 մլն դոլար ցուցանիշով, ինչը նախորդ տարվա նույն ժամանակահատվածի համեմատ շուրջ 23%-ով ավելի է։
Վրաստանի արտահանման հիմնական ապրանքներն են եղել մարդատար ավտոմեքենաները՝ 1,5 մլրդ դոլար, նավթն ու նավթամթերքը՝ 811,8 մլն դոլար, ինչպես նաև թանկարժեք մետաղների հանքաքարերն ու խտանյութերը՝ 464 մլն դոլար։
Ներմուծման մեջ նույնպես առաջատար են մարդատար ավտոմեքենաները՝ 2,65 մլրդ դոլար։ Դրանց հաջորդում են նավթն ու նավթամթերքը՝ 1,4 մլրդ դոլար, և դեղորայքը՝ 526,8 մլն դոլար։
Հետևեք մեզ տելեգրամում
