Վրաստանի արտաքին գործերի նախարարությունը ապատեղեկատվություն է որակել ադրբեջանական ԶԼՄ-ների հրապարակած այն տեղեկությունը, թե Սերբիայից եւ Ռուսաստանից Վրաստանով ականանետեր են տեղափոխվել Հայաստան:
Ինչպես հաղորդում է «Ինտերպրեսնյուզ»-ը՝ Վրաստանի ԱԳՆ մամուլի ծառայությունը ընդգծել է, որ Վրաստանը եւ Ադրբեջանը կապված են ռազմավարական գործընկերությամբ եւ երկու ժողովուրդների միջեւ վաղեմի բարեկամությամբ, ինչը զարգանում եւ խորանում է:
«Ադրբեջանական լրատվամիջոցներից մեկը տարածել է ապատեղեկատվություն, որը պարունակում է բազմաթիվ անճշտություններ: Ցավոք, ադրբեջանական իբր լուրջ ինտերնետային լրատվամիջոցը կողմնակալ կերպով նկարագրում է փաստերը, մոլորեցնում է հասարակությանը եւ փորձում է ստվեր գցել վրաց-ադրբեջանական ռազմավարական գործընկերության եւ բարեկամության վրա:
Այս հոդվածը միտումնավոր բնույթ է կրում եւ ուղղված է երկու երկրների՝ ռազմավարական գործընկերների միջեւ արհեստականորեն խնդիր ստեղծելուն», — ասված է ԱԳՆ հայտարարության մեջ։
Հետևեք մեզ տելեգրամում
