Թուրքիայի կառավարությունը պետք է դադարեցնի Հունաստանի հետ վիճելի Միջերկրական ծովի ջրերում նավթի և գազի հետախուզման ուղղությամբ բոլոր աշխատանքները: Այս մասին ասված է օգոստոսի 16-ին հրապարակված ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեֆ Բորելի հայտարարության մեջ:
«Ես կոչ եմ անում Թուրքիայի իշխանություններին անհապաղ դադարեցնել այս գործունեությունը, ինչպես նաև ամբողջովին և բարեխղճորեն ներգրավվել Եվրամիության հետ լիարժեք երկխոսության մեջ», – ասել է Բորելը:
Դիվանագետն անդրադառնալով Թուրքիայի հրապարակած նոր Navtex-ի (նավիգացիոն տելեքս) ծանուցագրին, ասել է, որ Կիպրոսի և Եգիպտոսի ծովային գոտում թուրքական «Yavuz» նավի կողմից հորատման աշխատանքների վերսկսումը մեծացնում է լարվածությունը Արևելյան Միջերկրականում:
Նշենք, որ անցյալ տարվանից Թուրքիայի, Հունաստանի և Կիպրոսի կողմից Միջերկրական ծովում գազի որոնման աշխատանքների պատճառով, տարածաշրջանում լարվածությունը սրվել է: Վերջերս Եվրամիությունը հայտարարել է, որ Կիպրոսի ափերին նավթի և գազի որոնման Թուրքիայի ծրագիրը մտահոգություն է առաջացրել տարածաշրջանում:
Նախօրեին Թուրքիայի հրապարակած Navtex-ի ծանուցագրով նախատեսվում է մինչև սեպտեմբերի 15-ը երկարաձգել «Yavuz» նավի հորատման աշխատանքները, որոնց կմիանան նաև թուրքական «Էրթուղրուլ բեյ», «Օսման բեյ» և «Օրհան բեյ» նավերը:
Հիշեցնենք, որ Թուրքիան որոշել է Միջերկրական ծովում սեյսմիկ հետազոտություններ անցկացնել ՝ չնայած Հունաստանի բողոքներին: Այս հարցում Աթենքին աջակցել է Ֆրանսիան, ինչի կապակցությամբ նա Միջերկրական ծովի արևելյան մասում երկու «Rafale» կործանիչ և ֆրեգատ է տեղակայել:
Հետևեք մեզ տելեգրամում
