Օգոստոսի 25-ին Սիրիայի արևելյան Հասակա նահանգում ամերիկացի մի քանի զինծառայողներ են վիրավորվել, երբ ռուսական զրահամեքենան բախվել է նրանց մեքենային: Այդ մասին հաղորդել է Reuters-ը՝ վկայակոչելով ԱՄՆ-ի անանուն պաշտոնյաների:
Լրատվամիջոցների վարկածներով՝ ռուս զինվորականները դիտավորյալ են բախվել: Ըստ նախնական հաղորդագրությունների՝ վիրավորվել է ԱՄՆ-ի մինչև 4 զինծառայող: Արևմտյան լրատվամիջոցներն ընդգծում են, որ ոչ մի կողմ զենք չի օգտագործել: Ամերիկյան կողմի համաձայն, ռուսական բանակի ուղղաթիռը ցածր բարձրության վրա է թռել դեպքի վայրում:
«Սա մանևր է, որը զինվորականները հաճախ օգտագործում են այն ժամանակ, երբ ցանկանում են, որ մարդիկ լքեն տարածքը»,- այս տեղեկությունը տարածել է CNN-ը:
Արաբական «Ալ-Մասդար» պորտալը հրապարակել է մի քանի տեսանյութ, որոնք ցույց են տալիս, թե ինչպես է ռուսական զրահափոխադրիչը մոտենում ամերիկյան զրահամեքենային: Կադրերը ցույց են տալիս նաև ռազմական այլ մեքենաներ, որոնք, ըստ ամենայնի, չեն մասնակցել միջադեպին:
Հիշեցնենք, որ ավելի վաղ Ռուսաստանը և Սիրիան պայմանավորվել են ռուսական Հմեյմիմի ավիաբազան ընդլայնելու համար լրացուցիչ տարածք և ջրատարածք հանձնելու շուրջ:
Հետևեք մեզ տելեգրամում
