Թուրքական իշխանությունները Ստամբուլում անձնագիր են տրամադրել ՀԱՄԱՍ-ի 12 անդամների: Այս մասին ասել է իսրայելցի բարձրաստիճան դիվանագետ Ռոյ Գիլադը:
Դիվանագետը Թուրքիայի այդ քայլը «ոչ բարեկամական քայլ» է որակել:
Պաղեստինի իսլամիստական ՀԱՄԱՍ շարժման առաջնորդների հետ Թուրքիայի նախագահի հանդիպմանն անդրադարձել է Անկարայում Իսրայելի գործերի ժամանակավոր հավատարմատար Ռոյ Գիլադը: Նա հիշեցրել է, որ դեռևս անցած տարի Իսրայելը Թուրքիային արդեն հայտնել էր, որ ՀԱՄԱՍ-ը Ստամբուլում «ահաբեկչական գործունեություն» է իրականացնում, սակայն Թուրքիան որևէ գործողություն չի ձեռնարկել:
Նա հայտնել է, որ Իսրայելն ապացույցներ ունի, որ Թուրքիան անձնագրեր և նույնականացման քարտեր է տրամադրում ՀԱՄԱՍ-ի անդամներին:
«Ոմանք գործընթացի մեջ են, ոմանք արդեն ստացել են (փաստաթղթեր), բայց խոսքը 10-ի մասին է: Մենք արդեն ունենք մեկ փաստաթուղթ, որի պատճենը կներկայացնենք կառավարությանը»,- ասել է Գիլադը:
Օգոստոսի 22-ին Թուրքիայի նախագահն այս տարի 2-րդ անգամ Ստամբուլում ընդունել է ՀԱՄԱՍ-ի ղեկավար Իսմայիլ Հանիային և այլ պաշտոնատար անձանց՝ վրդովմունք առաջացնելով Վաշինգտոնում, որն այդ մարդկանցից մեկին կապում է ահաբեկչական հարձակումների, ինքնաթիռների և մարդկանց առևանգման հետ: Անկարան հայտարարել է, որ հերքում է ԱՄՆ-ի քննադատությունը:
Նա ասել է, որ ՀԱՄԱՍ-ի այն անդամները, որոնք թուրքական փաստաթղթեր են ստացել, Ստամբուլից ահաբեկչություն են ֆինանսավորել և կազմակերպել, ինչը Թուրքիան նախկինում մերժում էր:
Գիլադը նշել է, որ ներկա լարվածությունը բացառում է Անկարայի հետ ցանկացած համագործակցություն Արևելյան Միջերկրականում, որտեղ Թուրքիան վիճարկում է Հունաստանի, Կիպրոսի և նրանց դաշնակիցների ծովային պահանջները:
Դիվանագետի խոսքով` նույնիսկ եթե հարաբերությունները Թուրքիայի հետ բարելավվեն, Իսրայելը չի հրաժարվի «վերջին տասը տարվա ընթացքում այլ երկրների հետ իր կառուցած ռազմավարական դաշինքներից»: «Իսրայելը չի պատրաստվում ավտոբուսի տակ գցել Հունաստանին, Կիպրոսին կամ Եգիպտոսին»:
Հետևեք մեզ տելեգրամում
