2020թ․ փետրվարի երկրորդ կեսից մինչև օգոստոսի սկիզբ Իրանում կորոնավիրուսի համավարակի պատճառով զգալիորեն ավելացել է գործզրկության մակարդակը։ Իրանի աշխատանքի և սոցիալական ապահովության նախարարության ներկայացուցիչ Մասուդ Բաբաի խոսքով՝ նշված ժամանակահատվածում գործազուրկների թիվը երկրում ավելացել է 850․000-ով։
Կորոնավիրուսի սոցիալ-տնտեսական հետևանքներից հատկապես տուժել է սպասարկման ոլորտը։ Երկրում գործող կազմակերպությունների 62 տոկոսը աշխատում է ծառայությունների մատուցման ոլորտում, որը նաև ամենաշատ աշխատատեղ ստեղծող ոլորտն է։ Իրենց աշխատանքը կորցրած քաղաքացիների 59 տոկոսը հենց այս ոլորտի աշխատակիցներն էին։ Արդյունաբերության ոլորտում աշխատանքը կորցնողները կազմել են 28 տոկոս։
Նշենք, որ Իրանի կառավարությունը կորոնավիրուսի տնտեսական հետևանքների չեզոքացման համար շուրջ 24 մլրդ դոլար է հատկացրել։ Դրանից շուրջ 3 միլիարդը նախատեսված է առողջապահության ոլորտի, 1․2 միլիարդը՝ գործազրկության մակարդակի նվազեցման համար։ 1․9 մլրդ դոլարը կհատկացվի անապահով ընտանիքներին, իսկ շուրջ 17․8 միլիարդը կուղղվի տեղական բիզնեսի խթանմանը։
Իրանում մինչ օրս կորոնավիրուսով է վարակվել 388․810 մարդ, որոնցից 22․410-ը մահացել են, 335․572-ը՝ առողջացել։ Ըստ Իրանի առողջապահության նախարարության՝ այս պահին վերակենդանացման բաժանմունքներում ծայրահեղ ծանր վիճակում են գտնվում 3․737 հիվանդ, որոնոց մոտ կորոնավիրուս է հաստատվել։
Հետևեք մեզ տելեգրամում
