Կ. Պոլսի Պատրիարքության պատգամավորական ժողովի ատենապետ Տիար Խաչիկ Ջանելը դեկտեմբերի 11-ին Ն.Ս.Օ.Տ.Տ. Արամ Ա. Վեհափառ Հայրապետին ուղղված նամակով տեղեկացրել է Բարձրաշնորհ Տ. Սահակ Եպիսկոպոս Մաշալյանի՝ Կ. Պոլսի Պատրիարք ընտրվելու մասին:
Վեհափառ Հայրապետը նորընտիր Պատրիարքին հղած շնորհավորական նամակում գրել է. «Հոգեկան ցնծությամբ և եղբայրական ջերմ սիրով ողջունում ու շնորհավորում ենք Ձեր ընտրվելը: Արդարև, Կ. Պոլսի պատրիարքական աթոռը երկար ժամանակ թափուր էր և զանազան դժվարություններից հետո ահա այսօր Աստծո օրհնությամբ ունի իր նոր Պատրիարքը՝ նոր նվիրումով շարունակելու պատրիարքության դարավոր առաքելությունը:
Մեծի Տանն Կիլիկիո կաթողիկոսությունը և մենք անձնապես եղբայրական սերտ հարաբերություններ ենք ունեցել Ձեր նախորդների՝ երջանակահիշատակ Գարեգին և Մեսրոպ պատրիարքների հետ: Վստահ ենք, որ Ձեր ընտրությամբ նոր ու փայլուն էջ կբացվի պատրիարքության կյանքում, և մեր երկու նվիրապետական աթոռների միջև սերտ գործակցությունը կշարունակվի»:
Հետևեք մեզ տելեգրամում
