Կառավարությունն այսօրվա նիստում վեց ամիս ժամկետով երկարաձգեց թուրքական ապրանքի ներմուծման արգելքը։ Էկոնոմիկայի նախարարի պաշտոնակատար Վահան Քերոբյանն ասաց, որ նախորդ որոշման վեցամսյա ժամկետը լրանում է հուլիսի մեկին։ Սա նշանակում է, որ կա անհրաժեշտություն նոր որոշման, որով կնախատեսվի ևս վեց ամսով երկարաձգել թուրքական ծագում ունեցող վերջնական սպառում ունեցող ապրանքների նորմուծումը ՀՀ։
«Թուրքական ծագման ապրանքների ներմուծման արգելքով ոչ միայն տնտեսական բնույթի սանկցիա է կիրառվում Թուրքիայի նկատմամբ, այլև անվտանգության տեսանկյունից դադարեցվում է հայաստանյան աղբյուրներից Թուրքիայի պետական գանձարանի ֆինանսական սնուցումը:
Նախագծի նպատակն է կանխարգելել թշնամական տրամադրված երկրից վերջնական սպառման ապրանքների ներմուծման միջոցով տարատեսակ վտանգների ներթափանցումը»,-ասել է նախարարի պաշտոնակատարը։
Ինչ վերաբերվում է այն փաստարկին, որ ներքին շուկայում առկա են տարբեր մաքսանենգ եղանակներով ներմուծված թուրքական ծագման ապրանքներ, ապա կառավարության տեսակետն այն է, որ անհրաժեշտ է ուժեղացնել մաքսային հսկողության մեխանիզմները։
Թուրքական ապրանքների նկատմամբ էմբարգո սահմանվեց 44-օրյա պատերազմից հետո։ Արգելքը ներառում է ոչ թե թուրքական հումքը, այլ վերջնական պատրաստի ապրանքը։
Հետևեք մեզ տելեգրամում
