Իրանի արտգործնախարարությունը բողոքի նոտա է հղել Ադրբեջանին: Այս մասին հայտնել է ադրբեջանցի ժողովրդական գրող, խորհրդարանի պատգամավոր (Քաղաքացիական համերաշխություն կուսակցությունից – Vətəndaş Həmrəyliyi Partiyası) Սաբիր Ռյուսթեմխանլըն՝ նշելով, որ Իրանի բողոքի պատճառը «Ազատ Իրան» միջազգային կոնֆերանսում իր ունեցած ելույթն է:
Ռյուսթեմխանլըն, ֆեյսբուքի էջում մեկնաբանելով Իրանի ԱԳՆ-ի բողոքը, նշել է, որ Իրանում վերջին նախագահական ընտրություններին նվիրված կոնֆերանսը, որին ինքը մասնակցել է, անցկացրել է Իրանի ժողովրդական մուջահիդների կազմակերպությունը, որն իրանական իշխանության թշնամի է համարվում:
Սաբիր Ռյուսթեմխանլըն ներկայացրել է իր ելույթի թեման, որի առանցքում է եղել իր իսկ ներկայացմամբ «Հարավային Ադրբեջանը»՝ թյուրքախոս բնակչություն ունեցող Իրանի հյուսիսային շրջանները:
«Իմ ելույթի հիմնական մասը Հարավային Ադրբեջանի և Իրանի ժողովուրդների ճակատագրի հետ է կապված եղել, նշել եմ նորմալ, ժողովրդավարական համակարգի ստեղծման համար այդտեղ բոլոր ժողովուրդների համատեղ պայքարի կարևորությունը և բացի այդ նաև այն, որ Ադրբեջանի թյուրքերն այս տեսանկյունից հիմնական խոսք ասողն են»,- ասել է ադրբեջանցի պատգամավորը:
Թեև Ռյուսթեմխանլըի գրառումից պարզ է դառնում, որ նա կիրառել է «Հարավային Ադրբեջան» արհեստածին տերմինը և տարբերակում դրել «Հարավային Ադրբեջանի և Իրանի ժողովուրդների» միջև, այնուամենայնիվ, նա կարծիք է հայտնել, թե իր ելույթի սխալ ընկալման պատճառը կարող էր լինել պարսկերեն թարգմանությունը և խոսքի որոշակի կրճատումները:
Ռյուսթեմխանլըն գրառման մեջ նաև դժգոհել է, որ Իրանը մշտապես Ադրբեջանի ժողովրդի և պետության իրավունքներն անտեսել է, չնայած նրան, որ Ադրբեջանը մշտապես Իրանի հետ բարիդրացիական հարաբերությունների կողմնակիցն է եղել:
«Մեզ «շիա եղբայր» ասելով քրիստոնյա հային է օգնել, քանի որ Իրանում շիայականությունն այլ բան չէ, քան պարսկական-շովինիստական ռեժիմի քաղաքական գործիքը։ Արդյո՞ք Իրանը չէր խառնվում մեր ներքին գործերին, երբ բռնազավթիչ Հայաստանին 30 տարի ամեն կերպ սատար էր կանգնում, նրան շունչ էր տալիս, մեր բռնագրավված գյուղերը թալանում էր, բռնազավթչին եղբայր էր անվանում, նրան Թեհրանում թուրքի դեմ երթերի էր դուրս բերում։ Պատերազմի օրերին սեփական տարածքով զենքի փոխադրմանը թույլտվություն տալը արդյո՞ք չի նշանակում խառնվել մեր ներքին գործերին»,-գրել է Ռյուսթեմխանլըն։
Նշենք, որ Իրանի ԱԳՆ-ից Ադրբեջանի ԱԳՆ-ին ուղարկված նոտայի մասին ո՛չ իրանական կողմից, ո՛չ ադրբեջանական կողմից պաշտոնական հայտարարություն դեռևս չի արվել։
Հետևեք մեզ տելեգրամում
