Սեպտեմբերի 6-ին դիվանագիտական առաքելության ավարտի կապակցությամբ՝ Իրաքում ՀՀ դեսպան Հրաչյա Փոլադյանը հանդիպել է Իրաքի Հանրապետության նախագահ Բարհամ Սալեհին։ Այս մասին հաղորդվում է Իրաքում ՀՀ դեսպանատան կայքում:
Հանդիպման ընթացքում նախագահ Սալեհը շնորհակալություն է հայտնել դեսպան Փոլադյանին՝ երկկողմ հարաբերությունների զարգացման շրջանակներում կատարված արդյունավետ աշխատանքի համար: Նա կարևորել է Իրաքում Հայաստանի դիվանագիտական ներկայության ընդլայնումը, տնտեսական, մշակութային ծրագրերի և նախաձեռնությունների ակտիվացումը, ինչպես նաև ընդգծել է վերջին տարիներին կատարված արդյունավետ աշխատանքը։
Դեսպան Փոլադյանն էլ շնորհակալություն է հայտնել նախագահ Սալեհին ջերմ ընդունելության և գնահատանքի խոսքերի համար և գոհունակությամբ նշել, որ իր պաշտոնավարման ընթացքում իրաքյան իշխանություններն և անձամբ նախագահ Սալեհը գործուն աջակցություն են ունեցել Իրաքում ՀՀ դեսպանության ամենատարբեր ծրագրերի և նախաձեռնությունների իրականացման գործում,- նշում է Իրաքում ՀՀ դեսպանատան կայքը:
Հետևեք մեզ տելեգրամում
