Գերմանիայում հիվանդանոցները պատրաստում են հնարավոր պատերազմի սցենարին

Գերմանիայի կառավարությունը վերանայում է հիվանդանոցների և բժշկական ենթակառուցվածքների պատրաստվածությունը հնարավոր ռազմական հակամարտության և անօդաչու թռչող սարքերի հարձակումների պարագայում։ Այդ մասին հաղորդում է «Bloomberg» պարբերականը։

Մատնանշվում է Ուլմի հիվանդանոցը, որի տակ գտնվում է 1979-ին կառուցված ստորգետնյա բժշկական համալիրը։ Այն նախատեսված է 2000 մարդու տեղավորման և մինչև 90 օր գործելու համար։ Գերմանացի զինվորականներն այժմ քննարկում են դրա վերակառուցման հարցը։

Իշխանությունները նաև ուսումնասիրում են առողջապահական համակարգի հնարավորությունները պատերազմի դեպքում։ Պաշտպանության նախարար Բորիս Պիստորիուսը հայտարարել է, որ Ռուսաստանը կարող է հարձակվել ՆԱՏՕ-ի վրա մինչև 2029 թվականը։

Բունդեսվերի տվյալներով՝ եթե հակամարտություն սկսվի, գերմանական հիվանդանոցները կարող են օրական ընդունել մինչև 1000 վիրավոր զինվորի։