Թուրքական իշխանամերձ «Haber7» լրատվական կայքի սյունակագիր Թահա Դաղլըն Թուրքիայի և Ռուսաստանի նախագահների հանդիպումից առաջ անդրադարձել է երկու երկրների միջև նկատվող լարվածությանը և դրա պատճառներին:
Ըստ հոդվածագրի՝ Էրդողան-Պուտին գագաթնաժողովից առաջ, դեռ բանակցությունները չսկսված՝ 10 օրվա ընթացքում ռուսները Թուրքիայի դեմ 3 քայլ են արել՝ Իդլիբի ուղղությամբ, քրդական հարցում և Հարավային Կովկասում:
Հեղինակի պնդմամբ՝ Ռուսաստանը սկսել է ռմբակոծել Իդլիբը: Փաստացի, Թուրքիայի կողմից հովանավորվող Սիրիայի ընդդիմությունը երկու հենակետ ուներ՝ Դերյան և Իդլիբը: Առաջինն անցել է Սիրիայի իշխանությունների վերահսկողության տակ, իսկ վերջինի ուղղությամբ լայնածավալ հարձակումը կարող է ծանր վիճակի մեջ դնել Թուրքիային:
Քրդական թեմայի առնչությամբ հեղինակը նշել է, որ Ռուսաստանը Սիրիայի քրդերին դրական ուղերձներ է տալիս: Մասնավորապես հիշեցվել է, որ Մոսկվայում կայացած Պուտին-Ասադ հանդիպումից մի քանի օր անց Ռուսաստանի փոխարտգործնախարարը հյուրընկալել է Սիրիայի քրդական «Ժողովրդավարական միություն» կուսակցության (PYD) առաջնորդ Իլհամ Ահմեդին: Նշենք, որ Թուրքիան PYD-ին համարում է ահաբեկչական կազմակերպություն և «Քուրդիստանի բանվորական կուսակցության» (PKK) ճյուղավորումը:
Դաղլըն նշել է, որ կովկասյան ճակատում Ռուսաստանի դժգոհությունը հարուցել են նախորդ շաբաթ անցկացված Թուրքիայի-Ադրբեջան-Պակիստան եռակողմ, Թուրքիա-Ադրբեջան երկկողմ զորավարժություններ: Նրա խոսքով՝ այս հարցում ռուսական կողմի անհանգստության մասին բարձրաձայնել է ՌԴ ԱԳՆ խոսնակ Մարիա Զահարովան:
Ըստ սյունակագրի՝ Ռուսաստանը Թուրքիայի դեմ դիրքորոշումը կոշտացնելու մի շարք պատճառներ ունի.
- Ուկրաինա-Թուրքիա հարաբերությունները: Թուրքիայի՝ բանավոր դրական պատասխանը Ուկրաինային օգնելու հարցում ՆԱՏՕ-ի խնդրանքին: Ղրիմի հարցում Թուրքիայի դիրքորոշումը:
- Թուրքիա-Վրաստան նույնատիպ հարաբերությունները:
- Թուրքիա-Ադրբեջան մտերմությունը:
- Լիբիայում գեներալ Հաֆթարին Ռուսաստանի աջակցությանն ի հակադրություն Թուրքիայի միջամտությունը և դրա արդյունքում ուժերի հավասարակշռության փոփոխությունը:
- Աֆղանստանում ստեղծված իրավիճակը, որը Ռուսաստանն իրեն ուղղված սպառնալիք է համարում:
Ըստ թուրք հոդվածագրի դիտարկման՝ ամեն անգամ, երբ Պուտինը Թուրքիայի հարցում խնդիրն է ունենում, Իդլիբում է գործողություն իրականացնում՝ այն համարելով Թուրքիայի թույլ կետը: Դաղլըի պնդմամբ՝ վերջին անգամ, երբ Պուտինը նման քայլ է արել Իդլիբում, զոհվել է 34 թուրք զինվոր: Սրան ի պատասխան թուրքական կողմը 2000-ից ավել Ասադի և Իրանի զինյալների էր վերացրել, ոչնչացրել էր ռուսների «Պանցիր» ՀՕՊ համակարգերը:
«Իդլիբում ռուսական ռուլետկա խաղալու Ռուսաստանի ձգտումը կարող է ծանր նստել Թուրքիայի վրա, սակայն դա վստահաբար միակողմանի չի լինելու»,- նշել է հոդվածագիրը:
Հետևեք մեզ տելեգրամում
