Հոկտեմբերի 14-ին Բեյրութում՝ Թայունի թաղամասում անհայտ անձիք կրակ են բացել Հեզբոլլահի և Ամալ շարժման ցուցարարների վրա, ովքեր շարժվում էին դեպի Արդարադատության պալատ: Ցուցարարները պահանջում էին դատավոր Թարեք Բիթարի հրաժարականը, ով քննում է անցած տարի տեղի ունեցած Բեյրութի նավահանգստի պայթյունը:
Ներքին գործերի նախարարությունը հայտնել է, որ զինված բախումը սկսվել է դիպուկահարի կրակոցից: Ձերբակալվել է 8 մարդ: Զինված բախումները շարունակվել են գրեթե 5 ժամ:
Լիբանանի առողջապահության նախարարությունը հաղորդել է 7 զոհերի և 32 վիրավորների մասին:
Լիբանանի նախագահ Միշել Աունը կոչ է արել պահպանել հանդարտություն:
«Զենքերը չեն կարող հաղորդակցության միջոց դառնալ լիբանանյան կուսակցությունների միջև, որովհետև մենք բոլորս համաձայնել ենք թերթել մեր պատմության մութ էջը»,- ասել է Աունը՝ նկատի ունենալով քաղաքացիական պատերազմը:
Հեզբոլլահը և Ամալ շարժումը զինված բախումները հրահրելու մեջ մեղադրում են «Լիբանանյան ուժեր»-ին: Սակայն «Լիբանանյան ուժերը» հերքում են իրենց ներգրավվումը:
Նշենք, որ նույն ժամանակահատվածում Լիբանան էր ժամանել ԱՄՆ պետքարտուղարի քաղաքական հարցերով տեղակալ Վիկտորիա Նուլանդը:
Հետևեք մեզ տելեգրամում
