Հայաստանը հայ-ադրբեջանական սահմանին ստեղծված իրավիճակը հանգուցալուծելու համար Ռուսաստանին դիմելու գործընթաց է սկսում՝ երկրների միջև 1997 թվականի պայմանագրի շրջանակներում: Հանրային հեռուստաընկերության տված հարցազրույցում այս մասին ասել է ՀՀ անվտանգության խորհրդի քարտուղար Արմեն Գրիգորյանը:
«Մենք կարևոր ենք համարում ընդգծել՝ քանի որ հարձակում է տեղի ունեցել Հայաստանի սուվերեն տարածքի վրա, մենք դիմում ենք Ռուսաստանին Հայաստանի և Ռուսաստանի միջև գոյություն ունեցող 1997 թվականի պայմանագրի շրջանակներում ՀՀ տարածքային ամբողջականությունը պաշտպանելու կոչով և համաձայնագրի շրջանակներում փոխադարձ պարտականությունները իրագործելու տրամաբանության շրջանակներում»,- հայտարարեց Գրիգորյանը:
Հարցին՝ սա բանավոր դիմո՞ւմ է, թե գրավոր ընթացակարգով էլ դիմել են, Գրիգորյանը պատասխանեց. «Սա բանավոր դիմում է, որը գրավոր ընթացակարգ է ունենալու: Մենք ուզում ենք հանրությանը և մեր գործընկերներին տեղեկացնել, որ այսպիսի գործընթաց ենք սկսում: Մենք ակնկալում ենք, որ ՌԴ-ն օգնություն կտրամադրի, և մենք հնարավորություն կունենանք վերականգնել ՀՀ տարածքային ամբողջականությունը»,- ասաց ՀՀ ԱԽ քարտուղարը:
Նա հավելեց՝ բազմաթիվ անգամ խոսվել է, որ ՀՀ պետական սահմանը կարմիր գիծ է ՌԴ-ի համար: Արմեն Գրիգորյանը նշեց, որ մայիսի 12-ից սկսած՝ ադրբեջանցիները խախտում են այդ կարմիր գիծը: «Այս առումով մեր դաշնակցին դիմում ենք, որպեսզի կարողանանք մեր դաշնակցային պարտավորությունների շրջանակներում վերականգնել ՀՀ տարածքային ամբողջականությունը»,- մանրամասնեց Գրիգորյանը:
Անդրադառնալով հարցին՝ այդ օգնությունը ենթադրում է բանակցություններին մասնակցություն, թե՞ զինված ուժերով օգնություն. Գրիգորյանն արձագանքեց. «Եթե հնարավոր լինի այս իրավիճակը լուծել բանակցային ճանապարհով, ապա բանակցային ճանապարհով լուծել, եթե հնարավոր չի լինում լուծել բանակցային ճանապարհով, ապա տրամադրել ՀՀ-ին բավական ռազմական օգնություն, որպեսզի ՀՀ-ն կարողանա ստեղծված իրավիճակը հանգուցալուծել»,- նշեց նա:
Հետևեք մեզ տելեգրամում
