Դեկտեմբերի 21-ին ԱՄՆ ազգային անվտանգության հարցերով խորհրդական Ջեյք Սալիվանը ժամանելու է Իսրայել: Տեղեկությունը հայտնում է իսրայելական Jerusalem Post կայքը:
Կայքի հաղորդմամբ՝ նա հանդիպելու է Իսրայելի վարչապետ Նաֆթալի Բեննեթի և այլ բարձրաստիճան պաշտոնյաների հետ: Քննարկվելու է Իրանի միջուկային ծրագիրը և ռազմավարական այլ հարցեր:
Հաղորդվում է նաև, որ Իսրայելում անցկացվելիք բարձրաստիճան հանդիպումներից հետո Սալիվանը մեկնելու է Ռամալլահ, որտեղ հանդիպելու է Պաղեստինյան ինքնավարության նախագահ Մահմուդ Աբբասի հետ:
Նշենք, որ դեկտեմբերի 17-ին Սալիվանը հայտարարել էր, որ Իրանի հետ միջուկային բանակցությունները լավ չեն ընթանում, և դա նախազգուշացում է Իրանի միջուկային գործընթացին:
Իսկ ավելի վաղ՝ դեկտեմբերի 14-ին Իսրայելի պաշտպանության նախարար Բեննի Գանցը պաշտոնական այցով գտնվում էր Վաշինգտոնում՝ կրկին Իրանի միջուկային հարցով: Այցի շրջանակներում ԱՄՆ-ը և Իսրայելը քննարկել են համատեղ զորավարժությունների անցկացումը Իրանի միջուկային ծրագրին «դիմակայելու» համար:
Հետևեք մեզ տելեգրամում
