Քուվեյթի արտգործնախարար շեյխ Ահմեդ Նասեր Մուհամմադ Ալ- Սաբահը հունվարի 23-ին ժամանել է Բեյրութ և հանդիպել Լիբանանի ԱԳ նախարար Աբդուլլահ Բուհաբիբ, վարչապետ Նաջիբ Միկաթիի և նախագահ Միշել Աունի հետ Բաաբդա պալատում:
Արտգործնախարար Ալ-Սաբահը լիբանանցի բարձրաստիճան պաշտոնյաներին է ներկայացրել Քուվեյթի նախաձեռնությունը, որը նպատակաուղղված է Լիբանանի և Պարսից ծոցի երկրների միջև վստահության մթնոլորտի ամրապնդմանը: Այն բաղկացած է 12 մասից և նախապայմաններ չի առաջադրում: Քուվեյթցի դիվանագետը հայտնել է, որ այս նախաձեռնությունը համաձայնեցված է Պարսից ծոցի երկրների հետ:
Ըստ նախաձեռնության՝ Լիբանանը չպետք է չմիջամտի Պարսից ծոցի երկրների ներքին գործերին: Ալ-Սաբահի խոսքով՝ նախաձեռնությունը նաև աջակցելու է Լիբանանին, որպեսզի երկիրը չդառնա ագրեսիայի հարթակ:
Լիբանանի կառավարության աղբյուրների համաձայն՝ նախաձեռնությունը ներառում է արաբական և Պարսից ծոցի երկրների ինքնիշխանությունը հարգելը, միջազգային բանաձևերի իրականացումը, ինչպես նաև թմրանյութերի մաքսանենգության կանխարգելումը:
Իր հերթին Reuters-ը, վկայակոչելով դիվանագիտական աղբյուրները, հայտնում է, որ նախաձեռնության առաջարկները ներառում են Լիբանանի հավատարմությունը Տայիֆի համաձայնագրին, Անվտանգության խորհրդի բանաձևերի կատարումը և ընտրությունների ժամանակին անցկացումը։
Բեյրութ կատարած այցի ժամանակ քուվեյթցի դիվանագետը հանդիպել է նաև Լիբանանի նախագահ Միշել Աունի հետ: Հանդիպման ընթացքում կողմերը քննարկել են Լիբանանի և Պարսից ծոցի երկրների միջև վստահության մթնոլորտի ամրապնդման հնարավոր մեխանիզմները:
Իր հերթին Աունը ողջունել է Քուվեյթի այս քայլը՝ վերականգնելու Լիբանանի և Պարսից ծոցի երկրների միջև բնականոն հարաբերությունները: Նա նաև հավաստիացրել է, որ Քուվեյթի նախաձեռնության գաղափարները կքննարկվեն, և դրանց վերաբերյալ համապատասխան դիրքորոշման մասին կհաղորդվի շուտով:
Հիշեցնենք, որ Բեյրութի և Պարսից ծոցի երկրների միջև դիվանագիտական ճգնաժամի առիթ դարձավ Լիբանանի տեղեկատվության նախարար Ժորժ Կորդահիի՝ Aljazeera-ին տված հարցազրույցը, որտով նա քննադատել էր Սաուդյան Արաբիայի քաղաքականությունը Եմենի պատերազմում: Կորդահիի հայտարարությունից անմիջապես հետո Սաուդյան Արաբիան հետ կանչեց իր դեսպանին Բեյրութից և պահանջեց, որ Լիբանանի դեսպանն էլ հեռանա Ռիյադից: Դիվանագիտական ճգնաժամը ավելի խորացավ, երբ ի աջակցություն Սաուդյան Արաբիայի՝ Պարսից ծոցի որոշ երկրներ նույնպես հետ կանչեցին իրենց դեսպաններին: Ավելի ուշ Ժորժ Կորդահին հրաժարական տվեց: Սակայն նրա հրաժարականը չնպաստեց դիվանագիտական ճգնաժամի լուծմանը, քանի որ Սաուդյան Արաբիայի պահանջը «Հեզբոլլահի» դերի նվազեցումն է Լիբանանի քաղաքական կյանքում:
Հետևեք մեզ տելեգրամում
