Լիբանանում խորհրդարանական ընտրությունները պետք է անցկացվեն նախատեսված ժամանակացույցով մայիսին։ Այս մասին հայտարարել է Բեյրութում ԱՄՆ դեսպան Դորոթի Շին։
«Միջազգային հանրության շրջանակներում համաձայնություն կա, որ ընտրությունները պետք է անցկացվեն ժամանակին, արդար և թափանցիկ կերպով»,- ասել է ԱՄՆ դեսպանը Reuters-ին տված հարցազրույցում՝ հավելելով, որ «մանևրելու տեղ այլևս չկա»:
Ավելի վաղ՝ ՄԱԿ-ի Անվտանգության խորհուրդն ընդգծել է «2022 թվականի մայիսի 15-ին Լիբանանում ազատ, արդար և թափանցիկ ընտրությունների անցկացման» անհրաժեշտությունը։
Ուշագրավ է, որ նման հայտարարություններ արվում են այն մտավախությունների ֆոնին, որ Լիբանանում գործող ավելի ուժեղ կուսակցությունները կփորձեն հետաձգել ընտրությունները, քանի որ դրանց արդյունքը կարող է հանգեցնել նոր խորհրդարանում իրենց փոքրաթիվ ներկայացվածությանը։
Հիշեցնենք, որ Լիբանանում 2019 թվականի հոկտեմբերին տեղի էին ունեցել բողոքի ցույցեր, որոնց մասնակցում էին հարյուր հազարավոր քաղաքացիներ։ Բողոքի ցույցերի պատճառը երկրում տասնամյակներ տիրող «կոռուպցիան» և «վատ կառավարումն» էին։ Նման լայնամասշտաբ ցույցերից հետո երկրում առաջին անգամ են անցացվելու ընտրություններ, որոնց նախատեսված են մայիսին։ Խոշոր կուսակցությունների և պետական պաշտոնյաների մեծամասնությունը հավաստիացում է, որ մայիսին նախատեսվող ընտրություններն անպայմանորեն անցկացվելու են: Սակայն շատ վերլուծաբանները նշում են, որ որոշ կուսակցություններ, օրինակ՝ «Հեզբոլլահ»-ը և նրա դաշնակիցները, որոնք ներկայումս երկրի խորհրդարանում մեծամասնություն են կազմում, կարող են հետընթաց ունենալ:
Հետևեք մեզ տելեգրամում
