Իսրայելի ռազմաօդային ուժերը մի քանի հրթիռներ են արձակել Դամասկոսի ուղղությամբ։ Տեղեկությունը հաստատում է սիրիական SANA լրատվական գործակալությունը։
Գործակալության տվյալներով՝ փետրվարի 9-ին ժամը 12։56-ի սահմաններում իսրայելական ԶՈՒ-ը Բեյրութի հարավ-արևելքից հրթիռներ է արձակել Սիրիայի ուղղությամբ, իսկ ժամը 01:10-ին «երկիր-երկինք» տեսակի հրթիռներով հարվածներ է հասցրել Գոլանի ուղղությամբ՝ թիրախավորելով Դամասկոս քաղաքի մերձակայքում գտնվող որոշ կետեր։
Գործակալությունը նաև հայտնել է, որ Սիրիայի ՀՕՊ-ը խոցել է արձակված հրթիռներից մի քանիսը։ Սակայն հարձակման հետևանքով սպանվել է մեկ զինծառայող և վիրավորվել ևս հինգը։ Պատճառվել է նաև նյութական վնաս։
Իսրայելի ԶՈՒ-ն իր հերթին հաղորդել է, որ Սիրիայից արձակված զենիթային հրթիռը պայթել է Իսրայելի օդային տարածքում, որի պատճառով Ում Ալ-Ֆահմ քաղաքում և Արևմտյան ափի հյուսիսում գտնվող համայնքներում նախազգուշական ազդանշաններ են գործարկվել։ Իսրայելական կողմը տուժածների մասին ոչինչ չի հաղորդել։
Հետևեք մեզ տելեգրամում
