Իրանի նախագահ Հասան Ռոհանիի եղբայրը՝ Հոսեյն Ֆերեյդունը հոկտեմբերի 16-ին տեղափոխվել է Թեհրանի «Էվին» բանտ:
Իրանական աղբյուրների փոխանցմամբ՝ ս.թ. հոկտեմբերի 1-ին Իրանի վերաքննիչ դատարանի որոշմամբ ԻԻՀ նախագահի եղբայրը դատապարտվել է 5 տարվա ազատազրկման: Հասան Ռոհանիի եղբորը երկու տարի առաջ մեղարդանք է ներկայացվել, ըստ որի՝ նա մեղադրվում են կոռուպիցիոն գործարքներ իրականացնելու մեջ:
Երկու տարի առաջ կարճատև ձերբակալումից հետո Հոսեյն Ֆերեյդունը գրավի դիմաց ազատ էր արձակվել, սակայն նրա նկատմամբ հարուցված գործի քննությունը շարունակվում էր:
Ս.թ. փետրվարին ԻԻՀ Մեջլիսի պատգամավորները (20 հոգի) նամակով դիմել էին ԻԻՀ դատական իշխանության ղեկավարին՝ պահանջելով ընթացք տալ գործին:
Հավելենք, որ շուրջ մեկ տարի է, ինչ Իրանի դատական իշխանությունը ղեկավարում է Սեյյեդ Էբրահիմ Ռայիսին, որը 2017թ. նախագահական ընտրությունների ժամանակ Իրանի գործող նախագահ Հասան Ռոհանիի հիմնական մրցակիցն էր:
Նկատենք, որ Հոսեյն Ֆերեյդունը ԻԻՀ նախկին նախագահ Հաշեմի Ռաֆսանջանիի նախագահության տարիներին եղել է Մալայզիայում Իրանի դեսպանը, ինչպես նաև ՄԱԿ-ում ԻԻՀ ներկայացուցիչը:
2013թ. Հասան Ռոհանիի՝ ԻԻՀ նախագահ ընտրվելուց հետո նշանակվել է նախագահի հատուկ օգնական, Ժնևում և Լոզանում մասնակցել է միջուկային ծրագրի շուրջ Իրանի և «5+1 խմբի» միջև տեղի ունեցած բանակցություններին:
Իրանի նախագահի եղբայրը տեղափոխվել է կալանավայր
Հետևեք մեզ տելեգրամում
