Լիբանանի փոխվարչապետ Սաադ Ալ-Շամին հայտարարել է, որ պետությունը և նրա Կենտրոնական բանկը սնանկացել են և այլևս ունակ չեն իրականացնել ֆինանսական գործառույթները:
«Դա արդեն տեղի է ունեցել: Պետք է մտածել, թե ինչպես կորուստը բաշխել ֆինանսական կառույցների միջև և ինչպես նվազեցնել քաղաքացիների վնասը»,- ասել է փոխվարչապետը՝ լիբանանյան Al Jadeed հեռուստաալիքին տված հարցազրույցում:
Ինչ վերաբերում է Արժույթի միջազգային հիմնադրամի (ԱՄՀ) հետ բանակցություններին, ապա Շամին նշել է, որ գրանցվել է զգալի առաջընթաց:
«Ակնկալում ենք, որ (խմբ.՝ բանակցությունների) այս կամ հաջորդ փուլում համաձայնագիր կստորագրենք»,- հայտարարել է Լիբանանի փոխվարչապետը:
Ուշագրավ է, որ Լիբանանի Կենտրոնական բանկի կառավարիչ Ռիադ Սալամեհը հերքել է սնանկացման մասին արված հայտարարությունները: Նա հայտարարել է, որ բանկը դեռևս կատարում է օրենքով սահմանված պարտականությունները: Համաձայն փողի և վարկի մասին օրենքի 70-րդ հոդվածի՝ Կենտրոնական բանկին է վստահված լիբանանյան արժույթի ամբողջականության պահպանումը և տնտեսական կայունությունը:
Նշենք, որ 2019 թվականից Լիբանանում տնտեսական ճգնաժամ է տիրում։ Լիբանանյան ֆունտը կորցրել է իր արժեքի ավելի քան 90%-ը, իսկ բնակչության 80%-ը գտնվում է աղքատության մեջ:
Հետևեք մեզ տելեգրամում
