Սիրիայի վերադարձն Արաբական պետությունների լիգա (ԱՊԼ) կօգնի միավորել արաբական երկրների ջանքերը և դիրքորոշումները ինչպես տարածաշրջանում, այնպես էլ աշխարհում: Այս մասին հայտարարել է ՌԴ արտաքին գերատեսչության ղեկավար Սերգեյ Լավրովը՝ Մոսկվայում ԱՊԼ-ի արտգործնախարարներից կազմված պատվիրակության հետ մամուլի ասուլիսի ժամանակ:
«Հույս ունենք, որ Սիրիան արագորեն կվերադառնա Արաբական պետությունների լիգա»,- ասել է Լավրովը:
Հատկանշական է, որ երկուշաբթի ԱՊԼ-ի՝ արաբական որոշ երկրների արտգործնախարարներից կազմված պատվիրակությունը մեկնել էր Մոսկվա՝ ՌԴ արտգործնախարարի հետ հանդիպելու համար: Պատվիրակության կազմում են ԱՊԼ գլխավոր քարտուղար Ահմեդ Աբուլ Ղեյտը, ինչպես նաև Հորդանանի, Իրաքի, Եգիպտոսի, Սուդանի և Ալժիրի արտգործնախարարները:
Համատեղ մամուլի ասուլիսի ժամանակ Եգիպտոսի արտգործնախարար Սամեհ Շուքրին իր հերթին հաստատել է արաբական պատվիրակության պատրաստակամությունը՝ միջնորդական ջանքեր գործադրել Ռուսաստանի և Ուկրաինայի միջև բանակցային գործընթացին աջակցելու համար:
Նրա խոսքով՝ միջնորդական պատվիրակության նպատակն է հասնել ռազմական գործողությունների հրատապ դադարեցմանը և վստահության մթնոլորտի ամրապնդման համար մի շարք միջոցառումների քննարկմանը։
«Մենք հակամարտության բոլոր կողմերին կոչ ենք արել դադարեցնել էսկալացիան և ընդգծել ենք երկխոսության վրա հիմնված խաղաղ լուծումներին դիմելու անհրաժեշտությունը»,- ասել է Շուքրին:
Հաղորդվել է, որ Մոսկվայի այցից հետո արաբական միջնորդական պատվիրակությունը մեկնելու է Վարշավա՝ հանդիպելու Ուկրաինայի ԱԳ նախարար Դմիտրո Կուլեբայի հետ:
Հետևեք մեզ տելեգրամում
