Իսպանիայի հյուսիսաֆրիկյան Սեուտա անկլավում իրավիճակը կտրուկ լարվել է այն բանից հետո, երբ ընդամենը մի քանի ժամվա ընթացքում հազարավոր անօրինական միգրանտներ Մարոկկոյից լողալով և սահմանային արգելապատնեշները շրջանցելով մուտք են գործել իսպանական տարածք: Ստեղծված ճգնաժամային իրավիճակը կարգավորելու և անվտանգությունն ապահովելու նպատակով Իսպանիայի կառավարությունը որոշում է կայացրել տարածաշրջան ուղարկել զինված ուժերի լրացուցիչ ստորաբաժանումներ և Քաղաքացիական գվարդիայի ծառայողների: Այս մասին հայտնում է The Guardian-ը:
Սահմանային հատվածում ստեղծված իրավիճակը տեղի իշխանություններն ու իրավապահները նկարագրում են որպես լիակատար քաոս: Միգրանտների մեծ մասը երիտասարդ տղամարդիկ են, սակայն նրանց թվում կան նաև ընտանիքներ՝ կանանցով և երեխաներով: Մարոկկոյի իրավապահ մարմինները փորձել են ցրել սահմանին հավաքված բազմությանը՝ կիրառելով արցունքաբեր գազ և ջրցան մեքենաներ, սակայն սահմանային անցակետը կաթվածահար է եղել: Հաղորդվում է նաև առնվազն ինը զոհվածների մասին, որոնց մարմինները դուրս են բերվել ծովից:
Իսպանիայի վարչապետ Պեդրո Սանչեսը հայտարարել է, որ իշխանությունները մոբիլիզացնում են բոլոր անհրաժեշտ ռեսուրսները և սերտորեն համագործակցում են Մարոկկոյի ու միջազգային գործընկերների հետ՝ Սեուտայում բնականոն կյանքը հնարավորինս արագ վերականգնելու համար: Միևնույն ժամանակ, Իսպանիայի ներքին գործերի նախարարությունը մերժել է տեղական իշխանությունների՝ ազգային արտակարգ դրություն հայտարարելու պահանջը՝ պարզաբանելով, որ իսպանական օրենսդրությամբ նման ռեժիմ նախատեսվում է միայն բնական աղետների կամ հրաբխային ու միջուկային սպառնալիքների դեպքում, իսկ միգրացիոն ճգնաժամերը դրանց շարքում չեն ներառվում:
Սեուտայի ինքնավար քաղաքի նախագահ Խուան Հեսուս Վիվասը ահազանգել է, որ միգրանտների ընդունման կենտրոնները լիովին ծանրաբեռնված են, ինչի հետևանքով հարյուրավոր մարդիկ ստիպված են գիշերել փողոցներում: Նա կենտրոնական իշխանություններից պահանջել է անհապաղ ռեսուրսներ և ենթակառուցվածքներ տրամադրել սահմանների անխախտելիությունն ու քաղաքացիների անվտանգությունն ապահովելու համար:
Սեուտան և հարևան Մելիլիան հանդիսանում են Եվրոպական Միության միակ ցամաքային սահմանները Աֆրիկա մայրցամաքի հետ: Այդ պատճառով երկու անկլավները պարբերաբար ենթարկվում են միգրացիոն ուժեղ ճնշման, իսկ ներկայիս ճգնաժամը հիշեցնում է 2021 թվականի իրադարձությունները, երբ ընդամենը երկու օրում տարածք էր մուտք գործել ավելի քան 8,000 միգրանտ:
Հետևեք մեզ տելեգրամում
