Առանցքային դաշնակցի դիրքերից Ռուսաստանի Դաշնությունը շարունակելու է օգնել Հայաստանին պաշտպանունակությունն ամրապնդելու և սահմանների պահպանության գործում: Ինչպես տեղեկացնում է «Արմենպրես»-ը, այս մասին ասաց ՌԴ Արտաքին գործերի նախարար Սերգեյ Լավրովը ՀՀ արտաքին գործերի նախարար Արարատ Միրզոյանի հետ հանդիպման ժամանակ:
Սերգեյ Լավրովը ողջունեց Արարատ Միրզոյանին՝ նշելով, որ հայ-ռուսական դիվանագիտական հարաբերությունների հաստատմանը նվիրված միջոցառումների կազմակերպչական աշխատանքներն ամբողջ թափով ընթանում են և այս հանդիպումը ևս մեկ լավ հնարավորություն է՝ քննարկելու հետագա համագործակցությունը:
«Իհարկե, շահագրգռված ենք հայ-ռուսական կապերի հետագա զարգացմամբ։ Այդ կապերի զարգացման խթանման ուղղությամբ Դուք անձամբ երկար ժամանակ աշխատել եք: Ողջունում ենք Ձեր ներդրումը և Ազգային ժողովի նախագահի, և արտաքին քաղաքական գերատեսչության ղեկավարի պաշտոնում: Մենք արտաքին գործերի նախարարությունների միջեւ շատ հագեցած երկխոսություն ունենք, այն իրականացվում է համակարգային հիմունքներով: Փորձում ենք ներդնել պլանավորման բաղադրիչներ։ Եվ այսօր կստորագրենք հերթական երկու տարվա խորհրդատվությունների պլանը»,- նշեց Լավրովը:
Ըստ ՌԴ ԱԳ նախարարի` կորոնավիրուսի դեմ պայքարի հարցում իրավիճակը կարգավորվել է, պետք է ավելացնել մասնագետների առկա փոխգործակցությունը:
«Պատրաստվում ենք հերթական կարևոր իրադարձությանը, մեր ղեկավարների հերթական գագաթնաժողովին, և այսօր կքննարկենք, թե ինչպես ապահովել լրացուցիչ օրակարգերը, որոնք նոր որակ կհաղորդեն մեր դաշնակցային կապերին: Մենք շարունակելու ենք դաշնակցային դիրքերից օգնել ձեզ`պաշտպանունակությունն ամրապնդելու և սահմանի պահպանության գործում և, իհարկե, որպես հիմնական առևտրային գործընկեր, որպես հիմնական օտարերկրյա ներդրող՝ շարունակելու ենք փնտրել նոր նախագծեր, որոնք թույլ կտան ապահովել մեր առևտրի կայունությունը, ստեղծել նոր արտադրական հզորություններ, աշխատատեղեր: Այժմ պատրաստվում է առաջարկությունների հերթական փաթեթը, որն ուղղված է այն բանին, որ էապես լրացնի ռուսական ներդրումները Հայաստանի Հանրապետության տնտեսության մեջ»,- եզրափակեց Լավրովը:
Հետևեք մեզ տելեգրամում
